27.09.2012, 16:22 Тешко се договараат земјоделците и преработувачите
И покрај стимулациите и бенефитот, договорното производство никако да заживее
Струмица - И покрај стимулациите и бенефитот што го носи, договорното производство меѓу земјоделците и преработувачите никако да заживее. Ова е заклучокот од денешната средба меѓу земјоделците и преработувачите што се одржа во хотелот „Сириус“ во Струмица, на која беше промовиран и Прирачникот за договорно производство.
Средбата беше уште еден обид за спојување на земјоделците и преработувачите преку презентирање на ефектите што ги носи договорното производство, како што се сигурен пласман и гарантирани цени на земјоделското производство и квалитетна и сигурна суровина за преработувачките капацитети. Досегашното искуство покажува дека многу малку земјоделци се одлучуваат на склучување договори со преработувачите. Тие велат дека најчестата причина за тоа е што се' уште немаат доверба во преработувачите и тоа во делот на исплатата на предаденото производство, бидејќи секогаш нудат пониска цена на земјоделските производи од таа на пазарот.
И министерот за земјоделство, шумарство и водостопанство, Љупчо Димовски, смета дека договорното производство меѓу земјоделците и преработувачите не е на задоволително ниво.
„И покрај субвенциите што ги даваме за склучување договори меѓу земјоделците и преработувачките капацитети, и покрај тоа што ги мотивираме преработувачките капацитети да соработуваат со земјоделците, не е доволно. Евидентно е дека треба да се организираат вакви настани преку кои треба да ги натераме земјоделците да размислуваат за договорно производство, кое нуди сигурност за нивниот пласман, имаат договорена испорака на производството, висина на цената, исплата на средствата, и нема да бидат изложени на нервозни ситуации со осцилации на пазарот со високи цени, или во услови на огромна понуда, а ниски цени. Токму договорното производство ги избегнува ваквите проблеми. Од друга страна, тоа ќе го зголеми и квалитетот, бидејќи се темпира родот во согласност со капацитетите на преработувачите“, вели министерот за земјоделство, Димовски.
Инаку, во досегашната имплементација на овој проект околу 400 земјоделци од неколку региони биле поддржани во склучувањето договори со преработувачите од државата. (С.Т.)
|
