Како „Топлификација“ секогаш добива

Влезната температура на водата во системот треба да изнесува 70 степени, а се пуштаат 50, па затоа се студени становите, тврдат експерти

Маја Томиќ



Како „Топлификација“ секогаш добива, а граѓаните губат? Познавачи на состојбите тврдат за „Утрински весник“ дека виновник за студените или млаките радијатори во становите е единствено „Топлиф��кација“, која не треба да ја префрла вината врз граѓаните. Тие објаснуваат дека не се реални оправдувањата на „Топлификација“ за тоа ако повеќето станари се исклучени од парното греење, да е нормално кај другите да има пониска температура во станот затоа што ѕидовите на објектот се ладни. Или, на пример, дека мора, поради намалениот број на корисниците на парно, сметките на другите да бидат повисоки, затоа што техничкото одржување на опремата за греење ја чини „Топлификација“ исто како и порано.

Ова го тврди познавач на состојбите на функционирањето на „Топлификација“ и на нејзините „техники“ , како што вели тој, што ги применува компанијата при испораката на топлинска енергија. Тој вели дека никаде во светот не се практикува, ако надвор се повисоки температурите, да се исклучува целосно греењето. Туку ,дека е нормално да се намали нивото на водата низ системот.

„Количеството на топлината на радијаторите во становите ја регулира исклучиво ’Топлификација‘. Преку електромагнетни вентили таа пушта одредена вода со одредена температура низ системот, зависно од надворешната температура. И од нејзините степени зависи колку ќе бидат стоплени становите. Според правилниците, влезната температура на водата во системот треба да изнесува 70 Целзиусови степени. Но, од „Топлификација“ се пуштаат помалку, 50 степени, па затоа се студени становите. Така фирмата има помали трошоци, а наплаќа иста цена од граѓаните. Тоа е класично крадење на пари од луѓето“, вели за „Утрински“ овој познавач на состојбите, кој заради деликатноста на прашањето сака да остане анонимен.

Тој додава дека нема никаква логика од станарите кои преостанале да се греат на парно во зградата, да им се бара да плаќаат повеќе ако сакаат да им биде потопло во домот, затоа што во секој случај, и со помалку и со повеќе станари, исти се трошоците за компанијата.

Тој прашува зошто „Топлификација“ не вградува калориметри во становите со што ќе може да се види точно колку е потрошена енергија и за толку и да се плати.

„Работат според правилници од бивша СФРЈ, кога сите станови беа општествени и тогаш не можеше да се вградат поединечни мерачи. Но, сега е тоа возможно, ако не секаде, тогаш во оние згради каде што има едноцевен систем. А и таму не се вградуваат мерачи, затоа што тоа не и' оди во прилог на ’Топлификација‘. Така ќе има помал ќар. И на тој начин ги држат во статус - кво позиција граѓаните кои ем не знаат како се изигруваат со плаќањето, ем не им е познато каде можат да се пожалат“, вели тој.

Откако од 1 ноември цената на парното скокна за 8,5 отсто, по трет пат годинава, граѓаните се' помасовно почнаа да се откажуваат од ова греење. Едно е поради тоа што, откако е почната грејната сезона се мрзнат во становите, а друго и поради цената која пак ќе се зголеми од јануари наредната година.

„Лани се откажавме од парното и сме конечно задоволни од топлината во станот од 80 квадратни метри. Сега плаќаме за целата потрошувачка на струја по околу 2.600 денари месечно. Тоа ни е поисплатливо. Претходно, кога се греевме на парно плаќавме по 3.600 денари месечно. А, преку ден и после 21 часот се мрзневме“, изјави М.Ј., жител на Кисела Вода.

И додека скопјани се' помасовно се откажуваат од парното греење, а од „Топлификација“ молчат и за тоа и за новата цена, во Организацијата на потрошувачи на Македонија се зголемува бројот на граѓаните што реагираат на недостатоци во квалитетот на испораката на топлинската енергија, односно на услугите на „Топлификација“. Иако вчера беше закажан состанок на Советот за заштита на потрошувачи при Владата, на барање на ОПМ, на кој требаше да се разговара само за проблемите и за жалбите за парното греење, тој е одложен за идната недела.

На состанокот на Советот се поканети да присуствуваат претставници на Регулаторна комисија за енергетика, Агенцијата за енергетика, Народен правобранител, давателот на топлинската услуга и други релевантни институции. ОПМ ќе бара измена на одредени правилници за кои се смета дека се неадекватни на постојната состојба, како и промена на одредени законски и подзаконски акти кои се на штета на граѓаните.