Уште една барокна катна гаража во Центар

Парцелата се наоѓа во близина на „Автомакедонија“ и ќе се продава на лицитација со почетна цена од 1.850 денари за квадрат

Барокна катна гаража ќе никне и кај „Автомакедонија“. Инвеститор ќе биде приватно лице што ќе биде избрано за најповолен понудувач на лицитацијата за плацот на кој се наоѓа маркицата. Министерството за транспорт и врски денеска објави оглас за продажба на градежната парцела која е со површина од 1.245 квадратни метри. Почетната цена за лицитирање ќе изнесува 1.850 денари за квадрат. Инвеститорот ќе има обврска објектот да го изгради со фасада која ја наложуваат од Транспорт, односно по избраното идејно решение, кое предвидува објект со стилска фасада. Освен за паркирање, објектот ќе служи и за други намени.

„Наменета на објектот е катна гаража со компатибилни класи на намена, комерцијална или деловна ��ејност, трговски единици и угостителски единици кои можат да зафаќаат до 15 проценти од површината на објектот. За учество во јавното наддавање можат да се пријават сите заинтересирани правни и физички лица кои ги исполнуваат условите дадени во јавната објава објавена во печатените медиуми и на интернет-страницата на Министерството. Учесниците на јавното наддавање треба да достават и банкарска гаранција во висина од 200.000 евра во денарска противвредност, со која ќе се гарантира дека доколку понудувачот е избран за најповолен, ќе ја уплати крајно постигнатата цена во предвидениот рок од 15 дена“, информираа вчера од Министерството.

Рокот за пријавување за учество на електронското јавно наддавање е 31 мај, а лицитацијата е закажана за 7 јуни. (Дс.Т.)