24.04.2012, 15:48 Медведев ќе го наследи Путин во партијата
Рускиот премиер Владимир Путин, кој беше избран за претседател на изборите во март годинава, го предложи на лидерската функција на владејачката партија Единствена Русија актуелниот претседател Дмитриј Медведев.
Путин истакна дека е правилно по стапувањето на функцијата претседател на Русија на 7 мај да се откаже од овластувањата на претседател на Единствена Русија, бидејќи претседателот е натпартиска фигура. Тој потсети дека не станува збор за забрана, наложена од Уставот, но дека претседателот е функција што ги обединува сите руски политички сили.
Премиерот предложи во втората половина на мај да се одржи конгрес на „Единствена Русија“ на кој ќе биде одобрена кандидатурата на Медведев на претседателската функција. Медведев денеска изрази уверување дека ќе работи на заштита на човековите права и слободи.
„Развојот на слободите е моја приоритетна цел“, изјави Медведев за време на средбата во Кремљ со претставници на руската политичка елита. Се очекува Медведев да биде именуван на функцијата премиер, откако Путин официјално ќе стане претседател.
Медведев ги објави своите цели како премиер на Русија во следните четири години. Тој истакна деја Владата треба да усвои план за приватизација на оние државни компании, за кои ќе процени дека е несоодветно да останат по државна контрола. Медведев истакна дека се откажува од идејата за зголемување на даноците на сметка на поефикасно распоредување на буџетските средства.
|
