24.04.2012, 14:42 СДСМ: Кратењата во Буџетот се нереални
СДСМ смета дека ребалансот на Буџетот нема да одговори на предизвиците на намалување на економската активност и оти најавените кратења се нереални.
- На пример, Владата предвидува намалување на приходите од придонеси од 19 милиони евра, а во образложението планира раст на вработеноста од еден процент или 3.500 нови вработувања. Исто така, Владата ги крати капиталните расходи за 89 милиони евра со што овој буџет целосно ја губи развојната компонента и со тоа се доведува во прашање дали буџетот може да придонесе да се постигне планираниот раст на БДП од 2,5 проценти, посочи Маријанчо Николов, претседател на собраниската Комисија за финансирање и буџет.
Од СДСМ прашуваат како со ребалансот се планира надворешното задолжување да изнесува 226 милиони евра кога се најавени две нови задолжувања од 250 милиони евра од Дојче банк и 100 милиони долари од Светска банка. Прашуваат и дали Владата ќе гарантира редовна исплата на пензиите до крајот на годината со оглед на тоа што за исплата на пензии од буџетот во првите три месеци биле префрлени 150 милиони евра на Фондот за ПИОМ што претставува 85 проценти од потребните парични средства за исплата на пензиите.
Николов денеска уште еднаш го повтори ставот на партијата дека последни сектори во кои треба да има кратење на средствата се здравството и образованието.
- СДСМ потсетува дека во непродуктивните трошоци за врбите, аква парковите и катните гаражи се кријат парите кои му се одземаат на основниот сектор - образованието, рече Николов. Според СДСМ, новото задолжување нема да се искористи за здравството или образованието, туку за непродуктивни трошоци.
|
