24.04.2012, 13:25 Одбележани 107 години од загинувањето на Христо Узунов
Охрид - Охриѓани со повеќе манифестации му оддадоа почит на истакнатиот македонски револуционер Христо Узунов. Делегаци на Општина Охрид, на основното училиште што го носи името на Узунов и претставници на здружението „Богојавление“ положија цвеќе и се поклонија пред спомениците на револуционерот, во Охрид и во кичевското село Цер, местото каде што загинал.
Христо Узунов е роден на 22 февруари 1878 година, во Охрид. Татко му бил егзархиски учител и активно вклучен во револуционерното движење. Неговата мајка била по потекло од Струга од семејството на преродбенскиот деец Ѓорѓи Чакалов. Своето образование го почнал во родниот град, а по завршувањето на гимназијата во Солун, неколку години учителствувал во Охрид. Во револуционерната организација се вклучил во 1896 година заедно со Методиј Патче. Тој и неговите соработници револуционери во 1905 година во кичевското село Цер биле опколени од многуброен турски аскер и принудени да се предадат или да се самоубијат. Го избрале самоубиството. (В.М.)
|
