„Што и да одлучите, јас сум веќе уништен и згазен“



Љубе Бошкоски од судиите во Апелациониот суд побара да донесат исправна одлука за случајот „Кампања“

„Каква пресуда да напишете мене ми е сеедно затоа што јас сум понижен, уништен и згазен. Но, вие имате можност да ја прекинете судската практика во која политиката режира и суди“. Со овие зборови поранешниот минитер за внатрешни работи и лидер на Обединети за Македонија, Љубе Бошкоски денеска им се обрати на судиите во Апелациониот суд во Скопје кои на јавна седница ја разгледуваа пресудата која му беше изречена за случајот „Кампања“.

Љубе Бошкоски е осуден на седум години затвор за злоупотреба на службената положба и незаконско финансирање на изборна кампања.

Неговите адвокати и вчера ја оспорија пресудата посочувајќи дека за време на постапката не биле изведени докази дека парите навистина ги земал и ги искорист��л за нелегално финасирање на политичката кампања. Спорен за нив е и заштитениот сведок кој одбраната не успеала да го види, бидејќи бил сослушан преку видео врска со замаглена слика и мутиран глас. Тие реагираа и на начинот како е следен и прислушуван Бошкоски.

За една до две недели се очекува судиите ќе ја соопштат одлуката дали ќе му биде потврдена казната на поранешниот министер, или ќе биде донесена поинаква одлука. За сето време додека траеше јавната седница, пред Апелациониот суд беа родините, пријателите и сопартијците на Бошкоски.

Љубе Бошкоски се најде зад решетки само еден ден по завршувањето на парламентарните избори, односно на шести јуни минатата година, откако полицијата поднесе кривична пријава за него за две кривични дела. Тој беше обвинет дека во три наврати примил финаниски средства од негов познаник и дека со тие пари ја финансирал кампањата на неговата партија. Апсењето на Бошкоски се случи на паркингот пред ресторанот „Воденица“, каде беше пронајдено и ќесе со 100.000 евра.(Х.Р.)