Трета интерпелација за Јанкулоска

Во жестоката дебата, опозицијата бараше оставка од министерката за внатрешни работи. Гордана Јанкулоска се „товари“ за прикривање на убиството на Нешковски, за злоупотреба на МВР во случајот со Љубе Бошкоски, за политичка пресметка со пратеникот Фијат Цаноски...

Светлана Унковска


Министерката за внатрешни работи Гордана Јанкулоска, вчера, трет пат откако е на оваа функција, се соочи со интерпелација, што на Нова година и' ја поднесе пратеничката група на НСДП, а зад која застана цела опозиција. Во жестоката дебата опозицијата бараше одговорност од Јанкулоска поради, како што наведоа, многубројни пропусти во работењето на министерството. Прикривање на убиството на Мартин Нешковски, злоупотреба на МВР во случајот „Кампања“, во кој беше уапсен Љубе Бошковски, попречување на собраниската комисија да врши надзор и контрола на прислушувањето од страна на МВР, злоупотреба на министерската функција за време на последните парламентарни избори, потоа политичка пресметка со пратеникот Фијат Цаноски и уривање на „Космос“, се само некои од аргументите поради кои опозицијата бара одговорност од Јанкулоска. Таа вчера во својата одбрана ги отфрли обвинувањата, нарекувајќи ги несериозни, неаргументирани и полни со невистини кои потекнувале од кујната на Бранко Црвенковски.

Претходно, пред зградата на Собранието беше собрана група граѓани кои бараа Јанкуловска да си поднесе оставка. Меѓу насобраните пред законодавниот дом беа и членовите на семејството на убиениот Мартин Нешковски, кои бараа да присуствува на самата седница, но тоа не им беше дозволено. Групата трпеливо ја чекаше министерката, со свирчиња и транспаренти, но таа во зградата на парламентот пристигна од задниот влез.

ВМРО-НП вчера изрази поддршка за интерпелацијата, повикувајќи ја Јанкулоска „да си даде оставка доколку има грам совест“. Демократијата во Македонија тоне од 2006 година, а министерката за внатрешни работи Гордана Јанкулоска е меѓу главните виновници за тоа, смета Народна.

Според Деловникот, расправата по интерпелацијата треба да заврши за еден работен ден, а гласањето за довербата мора да се изврши до полноќ истиот ден.

Напад: Петковски

МВР е држава во држава

„МВР, под раководство на Јанкулоска, стана симбол за политичка пресметка со неистомисленици, за владеење со страв и насилство, како и дувло на корупција. Интерпелацијата за министерката е заслужена по сите основи, бидејќи МВР покажа дека е држава во држава“, истакна предлагачот на интерпелацијата, претседателот на НСДП Тито Петковски. Тој посочи дека главниот мотив да побара одговорност од Јанкулоска бил нејзиниот игнорантски однос кон пратениците и Комисијата за надзор над мерките за следење на комуникациите и неможност�� Собранието да изврши увид во случајот „Кампања“ и политичкото апсење Љубе Бошковски, како и прикривањето на убиството на младиот Нешковски. Тој предупреди и на, како што рече, појава на организирани криминални групи во структурите на полицијата. Според Петковски, министерката за внатрешни работи селективно ја спроведува правдата бидејќи немала ист однос кон нејзината партија ВМРО-ДПМНЕ, која немала доказ за потеклото и покритие за потрошени над три милиони евра за време на изборната кампања. „За Љубе Бошковски седум години затвор, а за криминалот на ВМРО-ДПМНЕ нема никаков доказ“, посочи Петковски.

На крајот од своето обраќање, тој, цитирајќи ја министерката Јанкулоска, која во интервју за агенцијата МИА рече дека нејзината интерпелација ќе биде крај на неговата кариера, запраша како мисли да го оствари тоа.

„Дали ќе го послушате советот на Миленко Неделковски да ме ликвидирате или, пак, мислите да ми го одземете мандатот“, праша Петковски.

Одбрана: Јанкулоска

Тоа е кујната на Црвенковски

Во одговорот на интерпелацијата, министерката Гордана Јанкулоска рече дека обвинувањата кон неа се несериозни, неаргументирани и со многу невистини, кое потекнувале од кујната на Бранко Црвенковски.

„Вистинските мотиви за интерпелацијата се разликите меѓу сегашното МВР и МВР во времето на Црвенковски. Преголем товар е тоа што им се случи на двајца претседатели во ваше време, настани кои не само што не беа спречени и истражени, туку никој и не понесе одговорност за нив. Преголем е товарот за исчезнатиот кокаин, за шверцот на цигари и нафта, помилување на партиски функционери“, возврати Јанкулоска. Таа рече дека под нејзино раководство министерството значително го подигнало угледот како институција, дека прислушување не постоело, ниту пак некакви забрани за надзор од страна на Собранието. Министерката порача дека со сите сили ќе продолжи да се бори против примената на селективната правда и дека МВР и натаму ќе ги почитува Уставот и законите.

„Случајот со Мартин Нешковски е врв на цинизмот на СДСМ и на нивната подготвеност, во очајот во кој се западнати, за сопствена промоција да користат лични трагедии“, рече Јанкуловска. Таа додаде дека за овој случај постои и разрешница во која сторителот на убиството на младото момче е осуден.