25.05.2012, 12:29 Уапсен „мозокот“ на трговијата со органи во Косово
ПРИШТИНА – Осомничениот за организирање трговија со органи, кого властите на Косово со години го бараат, е уапсен во Израел, изјави специјалниот обвинител на ЕУ, Џонатан Рател. „Добивме информација дека Моше Харел е уапсен во Израел поради трговија со органи и други кривични дела поврзани со тоа и сега чекаме потврда од израелските власти“, изјави Рател за агенцијата Франс прес.
Ако информацијата биде потврдена, ова апсење би можело да биде пресвртница на судењето на седум лица, обвинети за трговија со органи и нелегална трансплантација во клиниката „Медикус“ во 2008 година во Приштина, наведува АФП.
Харел е уапсен во Приштија истата година, но побегна од Косово штом беше пуштен од притвор. Косовските власти после тоа издадоа меѓународен налог за негово апсење. Според обвинението, во приштинската клиника во 2008 година се изведени најмалку 30 нелегални вадења и пресадувања на бубрези. Дарителите биле од сиромашни источноевропски и централноазиски земји, на кои за органите им биле ветувани 15.000 евра.
Во обвинителниот акт израелскиот државјанин Харел се посочува како „мозок“ на мрежата која пронаоѓала дарители и оние што ги примале органите. Меѓу седумте осомничени лица против кои се води судска постапка се наоѓаат поранешн функционер во косовското министерство за здравство Илир Реџај, и истакнатиот приштински уролог Љутфи Дервиши, наведува АФП. Третиот осомничен е турскиот лекар Јусуф Сонмез кој е обвинет за вршење на нелегални операции на вадење на органи. Против него е подигнато обвинение и во Турција.
Во косовската клиника во 2008 година полицијата направи претрес, откако еден труски државјанин колабираше на приштинскиот аеродром додека чекаше да се качи во авионот за Истанбул откако му бил изваден бубрегот.
Судскиот процес го води Еулекс кој е формиран со цел да им помогне на локалните правосудни органи во чувствителни случаи, откако таа територија во 2008 година еднострано прогласи независност од Србија, потсетува АФП.
|
