Насловна

Тајно ќе се гласа за доверба на Црвенковски

Не се очекува конгресот во Битола да биде вовед во посериозни потреси во СДСМ

На конгресот на СДСМ што ќе се одржи в недела во Битола се можни обиди за отворање дискусии кои би оделе во насока на барање одговорност за изборниот пораз. Но, партиски извори тврдат дека, сепак, нема атмосфера за посериозни потреси во партијата. Тие потенцираат дека 709 делегати ќе може одделно да се изјаснат и за довербата во лидерот Бранко Црвенковски и тоа со тајно гласање.

Останувањето на партискиот лидер на кормилото на СДСМ и во изборната кампања и по 5 јуни, главно, го проблематизираше владејачката ВМРО-ДПМНЕ. Експретседателот на СДСМ, Владо Бучковски, пак, меѓу редови во колумна во „Дневник“ испрати порака дека е потребно внатрепартиско преиспитување за изборниот пораз.

„Убеден сум дека ако се направи вистинска анализа ќе се види зошто не победивме. Не го отворам прашањето за да се врти приказната околу оставката на Бранко Црвенковски, туку секој да почувствува дали има одговорност. Лично сметам дека има погрешни процени и потези во изборната кампања и пред неа. А говорејќи за мерачите на аплаузот за Црвенковски, всушност, говорев за опкружувањето на претседателот на СДСМ“, ни изјави вчера Бучковски.

Од Андреј Петров, шеф на Изборниот штаб и секретар на СДСМ, добивме информација дека Бучковски ќе биде поканет на конгресот како поранешен претседател на партијата, иако не е делегат, исто како што ќе им бидат доставени покани и на екссекретарите. „Со тоа ќе покажеме дека СДСМ ниту има што да крие ниту има намера да оневозможува кого било во органите на партијата да си го каже своето мислење. И покрај статутарните можности на поинаков начин да се гласа за доверба на претседателот Бранко Црвенковски и на Централниот и на Надзорниот одбор, ние ќе го направиме тоа со тајно изјаснување. Така, на секој делегат ќе му овозможиме слободно да си го искаже мислењето“, појаснува Петров.

Тој потенцира дека раководството на партијата донело многу нови луѓе што се водечка сила во СДСМ и кои не се оптоварени со претходните односи, не се ничија продолжена рака, ниту, пак, се врзани за која било личност освен за партијата. Нивна единствена цел, како што вели Петров, е да се порази политичкиот противник.

Потпретседателот на СДСМ, Зоран Заев, е убеден дека ниту еден промил од членството или делегатите на конгресот нема да побараат оставка од Црвенковски, ниту, пак, би дискутирале против раководството бидејќи, како што вели, партијата е консолидирана и на последните избори, сепак, покажа дека ја има поддршката на околу 150.000 гласачи повеќе отколку на претходните предвремени избори. „Јас сум дел од раководството и ќе продуцирам дебата за предностите и за слабостите на партијата со цел да научиме како наредните изборни резултати да ни бидат подобри“, вели Заев и додава дека единството во СДСМ е потврдено на сите нивоа на партиско работење и апсолутно е „недвојбено мислењето дека претседателот Црвенковски треба и мора да остане да раководи со партијата. Сега и на Македонија и на членовите на партијата им треба единствен и уште посилен СДСМ поради нестабилноста на новата Влада, така што потребата од силна опозиција е во интерес на држава“.

Заев воедно потенцира дека нема апсолутно никаква причина да се појавуваат инсинуации дека тој е еден од незадоволниците во СДСМ и потенцијални кадри што можат нешто да променат.

„Јас сум еден од првите соработници на Бранко Црвенковски, а со тоа и еден од најповиканите да ги бранам политиките на ова партиско раководство на чело со лидерот. А тоа што ме сместуваат во некакви комбинаторики е резултат на моето големо влијание во СДСМ и обид на перфиден начин да предизвикаат некаков антагонизам спрема Бранко или кон раководството на партијата“, дециден е Заев. (Б.Ј.)

„Лично сметам дека имаше погрешни потези во кампањата“: Владо Бучковски

„Никој нема да биде оневозможен да си го каже своето мислење“: Андреј Петров

„Ниту еден промил од делегатите нема да побараат оставка“: Зоран Заев