Насловна

Поглед

Војската на царот

Горан Адамовски

Еј, што ти е среќа... Колегите од една телевизија имале таков касмет кога завчера правеа анкета дали на граѓаните им се допаѓа новиот споменик на Цар Самоил, да им се погодат се' „терсенџии“ на кои не им се допадна ниту идејата за фрлање пари среде криза ниту, пак, изгледот на споменикот. Десетина анкетирани и сите горе-долу со слични ставови.

Други колеги, пак, од една друга телевизија, имаа сосема спротивна среќа. Замислете, тие начекале единствено граѓани што беа воодушевени од Владата што и' текнало да му направи споменик на познатиот војсководец. „Да ги поживее Господ“, извика со сериозен глас еден од случајните минувачи. Ниту на едната телевизија немаше граѓани со различни ставови. Или се „за“ или „против“. Таква им била среќата на колегите, нели? Мислам, само тоа е работата, зарем се сомневате во нешто друго?

Тие, пак, што немаа среќа да налетаат на некоја од екипите за анкета, па јавно да си кажат што мислат за царот, беа доста креативни на „Фејсбук“ и на „Твитер“. „Царот дојде, кога ќе вадат око: пред или по одморите?“ - е еден од најефективните постови што го копираа интернетџиите. Да биде иронијата поголема, во близина на местото каде што е поставен Самоил ќе се гради мостот „Око“. Голем дел од енергијата и остроумноста е насочена кон несреќно избраниот момент во просторот и времето и што височината на Самоил се совпадна со стратегиските делови од телото на големиот Аце.

Македонецот знае да биде воодушевен, разочаран, рамнодушен, саркастичен, хумористичен и мудар и наоѓа начин каде и како да ги искаже своите емоции. Само треба да го оставиш да размислува со своја глава, а не да го индоктринираш. За жал, инструирањето кај нас е поголемо и од 33-метарскиот споменик во срцето на Скопје.