Иванов во Црна Гора
Македонија не отстапува од НАТО и од ЕУ
30.06.2011, 14:48
Македонија останува доследна на своите трајни и врвни цели и приоритети, водејќи се притоа од основниот принцип на отвореност и блискост со сите, изјави вчера македонскиот претседател Ѓорге Иванов на средбата на самитот на шефови на држави и влади од Процесот на соработка во Југоисточна Европа што се одржува во Црна Гора. Од Свети Стефан Иванов ја прати пораката дека целите на Македонија се јасни, а тоа се полноправно членство во НАТО и ЕУ, развивање извонредни односи со сите свои соседи, учество во сите регионални иницијативи, отвореност кон светот, кон меѓународната заедница, кон сите, по што резултатите не изостануваат. Според Иванов предвремените избори покажале дека мнозинството граѓани ги поддржале тие цели, што претставува обврска за новата влада.
Иванов од Црна Гора испрати порака дека најголемата моќ на регионот и на Европа е во нејзината отвореност и обединетост, додека најголемата опасност за нив демне од затвореноста и под��леноста. "Само заеднички можеме да ги решиме прашањата како регионалната енергетска поврзаност, заедничките транспортни коридори, заедничката железничка инфраструктура", рече тој. Според него Балканот мора да функционира како обединет регион, дел од обединетиот европски пазар и важна алка во европската комуникација кон светот. "Без интеграција на нашиот регион не можеме да зборуваме за целосно успешен и заокружен процес", изјави Иванов, додавајќи дека на регионот му е потребна поддршка за продолжување на интеграциските процеси.
|
