Насловна

Кинезите ни испратија 67 двокатни автобуси

Автобусите ќе бидат натоварени на брод и повеќе од еден месец ќе патуваат до Солун

Деспина Трајковска



Овој викенд се очекува да тргне првата пратка од 67 автобуси од зделката со кинеската компанија „Јутонг“ за 202 двокатни автобуса наменети за јавниот превоз во Скопје. Автобусите ќе патуваат со брод од пристаништето во Хонг Конг до Солун, од каде што ќе возат до Скопје. Се очекува во државава, конечно, да стасаат кон средината на август, а веќе до почетокот на учебната година да почнат и да возат по скопските улици.

Автобусите ќе стасаат пред договорениот термин за испорака на првите возила, кој истекува во декември годинава, а тоа го вети производителот кога беше официјализирана зделката. Од Министерството за транспорт и врски информираат дека автобусите почнале да се испорачуваат во изминатиот викенд.

„Од фабриката ‘Јутонг‘ во Женгжоу на 26, 27 и на 28 јуни се испорачани 67 новопроизведени двокатни автобуси што ќе се користат во јавниот градски превоз во Скопје. Од нив, еден е од отворен тип и ќе биде наменет за пано��амско разгледување на градот“, изјавија вчера од ресорното министерство, кое минатата недела ја пазари истата компанија да произведе и 15 даблдекери со отворен покрив, наменети, исто така, за туристички разглед на Скопје.

Автобусите што треба да стасаат ќе бидат идентични со оној што веќе трет месец вози по скопските улици. Со ретродизајн, емисија на издувни гасови „ЕУРО 4“, дигитален тахограф, автоматски управувана рампа за инвалидски и детски колички, целосно климатизирани... Автобусите имаат капацитет за 80 патници, по 20 за седење и стоење на долниот кат и 40 само за седење на горниот кат. Отворените два од зделката за 202 даблдекери и дополнително договорените 15 ќе се разликуваат од „обичните“ двокатни единствено по отворениот покрив и дополнителната опрема, како што се слушалки, микрофони, чадори и пепелници на отворениот покрив...

Според договорената зделка, целосна испорака на 202 автобуса треба да заврши до крајот на 2013 година. Односно, првата пратка од 67 автобуси да се реализира до крајот на годинава, до крајот на идната година да се испорачаат уште најмалку 68, а во 2013 да се произведат преостанатите автобуси. Отворените 15, пак, предвидено е да бидат готови и испорачани во Скопје најдоцна до декември в година.

И во двата случаја Владата договори да ги плати автобусите по секоја испорака. Сите автобуси ќе ја чинат речиси 40 милиони евра без ДДВ. За тие пари Скопје ќе може да се пофали дека поседува двокатни уникатни автобуси препознатливи за градот. Токму ретродизајнот, кој беше еден од главните услови на тендерот за автобусите е причина во главниот град да се возат сериски произведени даблдекери. Иако „Јутонг“ е најголемиот производител на автобуси во Азија и меѓу првите пет во светот и има произведено повеќе од 30.000 автобуси, сепак, по желба на Владата, првпат направи двокатен автобус со ретродизајн.