Писма - Јосип Броз Тито не бил провинцијалец

Звонко Каров, Кавадарци

Почитуван пратеник Александар Николоски,

Би сакал со најдобра намера и кон вас и политичката партија, чиј член сте, да ви укажам (а чувствувам потреба за тоа, зашто сум вршел јавна функција - пратеник), дека изгледа не се согласуваме околу клучното прашање што значи, всушност, македонското национално единство и движење и патот како тоа треба да се оствари.

Не верувам, дури сум лично убеден дека вашата партија го дели мислењето кое го искажувате кога тврдите дека Службата за државна безбедност ја формирало Република Македонија. Така произлегува од вашето тврдење дека високи комунистички функционери во поранешната федерација (и сите останати функционери, директори итн.) не можеле, а да не соработуваат со службите за безбедност. Тоа би значело (според вас) дека волјата на граѓаните за самостојна и независна држава е во „аут“, поточно суспендирана. И дека таа работа ја завршила УДБА, КОС, СДБ.

Ако имаме предвид дека Глигоров и Андов се едни од личностите на кои посочувате, произлегува дека ние (читај - државата) сме „фалс“ уште на почетокот. Тоа е тврдење кое ги омаловажува не само тие личности, туку целата одисеја на македонското движење за своја држава, која не започнала од 1941 година. Никогаш не сум го криел мислењето дека Јосип Броз Тито нас не не' „направил“, но дека бил водач на антифашистичкото и политичкото движење кое, според историските околности, дало рационално решение во федералниот модел на Југославија за потврдување на стремежите на македонскиот народ.

Само тоа, да не набројувам и друго (а има слабости, се разбира) го прави за мене НЕПРОВИНЦИЈАЛЕЦ. Тука, во федерална Југославија ние сме влегле со спогодба со останатите народи. Спогодба која можела да функционира додека можела. Причините за распадот различно ги разбираме и за тоа не би сакал да полемизирам со вас.

Вашите тврдења за „титоистичките“ кадри и функционери и нивната врска со нашата самостојност во старт сака да ја урива и концепцијата дека ние не сме кадарни да се справиме сами со сопствената рожба. И не' става на чистина дека допрва треба да се докажуваме (пред кого?) за целисходноста од нашето битисување. Го користите „титоизмот“ вулгарно до крајни граници, скривајќи го сопствениот видик на разрешување на „македонското прашање“. Со таквиот начин на расудување немате многу приврзаници во сопствената партија. Доколку би било поинаку, би донело конечен и катастрофален исход за нас сите и за македонската држава.

Затоа не смеете да создавате таков тип недоверба на нашиот - домашниот терен.

Почитуван пратеник Николоски, некои побрзаа да го укинат законот, други да прават циркус, а тој беше замислен како проект и важен акт кој требаше да покаже дека сме влезени во важен политички процес кој требаше да консолидира, а не да растура. Првичната верзија требаше да го спречи тој „лом“, зашто само така можеа да се спречат некои глупости со примената на законот.

Останувам со мислењето дека тргнувајќи од своите национални и државни интереси успешно ќе го завршиме овој процес. Тој тест ќе биде положен и ќе излеземе посилни од него. Убеден сум, г. пратеник, дека јорганот нема да го изгориме.