15.09.2012, 17:33 Роналдо: Меси повеќе ме фасцинира од Кристијано
„Во моите очи Меси е пред Роналдо. Му давам предност бидејќи за нијанса е покреативен“, изјави легендарниот Бразилец за домашните медиуми
Легендарниот бразилски фудбалер Роналдо изјави дека повеќе му се допаѓа играта на асот на Барселона, Лионел Меси, отколку на неговиот имењак Кристијано Роналдо.
„Во моите очи Меси е пред Роналдо. Му давам предност бидејќи за нијанса е покреативен. Иако е Аргентинец и познато е дека таа земја е ривал на мојот Бразил, сепак мојот избор е Меси“, изјави Роналдо за бразилските медиуми.
Тој додаде дека нема сомневање дека и Меси и Роналдо се фантастични играчи и дека им се восхитува и на двајцата.
Роналдо има и совет за својот сонародник Нејмар, а тоа е што побрзо да се пресели во Европа. Роналдо исто така со нетрпение го очекува Светското првенство кое ќе се одржува токму во Бразил во 2014 година.
,,Имаме млада екипа, ги имаме Нејмар, Пато, Тиаго Силва кој е одличен одбранбен играч, Гансо, Оскар. Велам дека имаме млада екипа и можеме да се надеваме дека ќе го освоиме Мундијалот'' - заврши некогаш најдобриот фудбалер на светот.
|
