17.09.2012, 12:44 Мацари: Пандев е идеален играч
Тренерот на Наполи со многу комплименти за играта на македонскиот напаѓач против Парма
Извонредната игра на Горан Пандев на натпреварот со Парма вчера не остана незабележана во фудбалската јавност во Италија. Напротив. Најдобриот македонски фудбалер е опсипан со комплименти од сите страни за тоа што избори пенал во 3 минута, по кој Единсон Кавани им донесе водство на неаполитанците, потоа постигна гол во 39 мин., а во 77 мин. му асистира на Лоренцо Инсиње за третиот погодок на домашниот тим. Третата победа во низа го зацврсти Наполи на врвот на табелата, а тренерот Валтер Мацари не го криеше воодушевувањето од играта на Пандев, кому дуелот со Парма му беше прв сезонава во Серија А поради црвениот картон што го доби во италијанскиот Суперкуп против Јувентус.
„Пандев е идеален играч за нашиот напаѓачки стил. Тој е еден од најдобрите фудбалери во светот кога станува збор за проигрување на своите соиграчи. Сторив се' за да го задржам во Наполи, а сега за него е прашање само на одржување на добра физичка кондиција. Тој е момче посветено на екипата и одличен е на теренот кога е способен за игра“, изјави Мацари по својот 300. натпревар како тренер во Серија А, во која има скор од 114 победи, 92 нерешени и 94 порази.
Слика од капитенот на македонската репрезентација осамна и на насловната страница на „Кориере дело спорт“, покрај тие на Вучиниќ од Јувентус и на Ернанес од Лацио, чии екипи исто така славеа со по 3:1 во ова коло.
„Пандев ги инспирира Кавани и Инсиње“, стои во насловот на вчерашниот број на италијанскиот дневен спортски лист.
Голот против Парма е 61. за Пандев во досегашните 255 настапи во Серија А и седми во 31 првенствен меч во дресот на Наполи. Најефикасен беше како играч на Лацио, за кој постигна 48 погодоци во елитната лига на Италија, во која за Интер даде пет гола. (Р.Д.)
|
