19.09.2012, 15:12 Адамс го доби златото од Лондон
Новозеланѓанката заврши како втора во финалето на 6 август зад Белорусинката Надежда Остапчук, но таа беше суспендирана поради позитивен допинг-тест
Новозеланѓанката Валери Адамс, конечно, го доби своето олимписко злато во фрлање ѓуле, 44 дена по натпреварувањето и 18.000 километри од Лондон. Адамс, која заврши како втора во финалето на 6 август зад Белорусинката Надежда Остапчук, но таа беше суспендирана поради позитивен допинг-тест, по што го доби блескавиот медал на специјална церемонија во Оукленд. Заедно со другите новозеландски освојувачи на медали од Лондон, 27-годишната Адамс се качи на подиумот и го доби медалот од генералниот гувернер на земјата, Џери Маепарае, пред да се интонира националната химна.
„Благодарност до цел Нов Зеланд за поддршката и љубовта која ја добив. Како спортист, ова го правам за сите вас“, изјави Адамс низ солзи пред 2.000 навивачи.
Трикратната светска шампионка и актуелна олимписка шампионка во Лондон, Адамс, се надеваше дека ќе го добие медалот додека беше во Европа и се натпреваруваше во Дијамантската лига. Меѓутоа, Остапчук го предаде медалот минатата недела и Адамс мораше да чека додека да се врати дома.
„Конечно го добив медалот и уште не ми се верува. Сега е време за уживање бидејќи има само шест вакви во Нов Зеланд“, додаде Адамс.
|
