СДСМ ќе пишува програма од врата на врата

Опозицијата, со почетокот на есента, влегува во нова кампања, од која треба да произлезат програмските насоки за локалните избори

Социјалдемократите влегуваат во нова кампања, шест месеци пред локалните избори, а пред финишот на „работното лето“, во чии рамки одржаа протестни митинзи низ повеќето градови во државата.

Со почетокот на есента, опозициски тимови, во кои ќе има и претставници на партиското раководство, ќе одат од врата на врата, за очи в очи да разговараат со граѓаните. Проектот е насловен „Отвори врата за иднината“, а секретарот на СДСМ, Андреј Петров, вели дека од овие активности ќе произлезе партиската програма за локалните избори, како и програмите за секоја општина поединечно.

„Тоа ќе бидат програми од граѓаните за граѓаните. За реализација на проектот, тимови на СДСМ ќе тропнат на секоја врата, во секој дом, во секое населено место, во секоја општина. Граѓаните ќе имаат можност првпат во историјата на Македонија самите да посочат каква иднина сакаат, каква општина сакаат, што треба да се промени, а што да се дополни или измени“, вели Петров.

Новиот стил на кампања е главен заклучок од завчерашната седница на Централниот одбор на СДСМ. Според информациите, Централниот одбор попатно отворил расправа и за случувањата меѓу коалициските партнери во Владата, но без конкретни заклучоци, бидејќи, како што наведуваат од партијата, кризата во релациите е проблем што треба да си го решаваат ВМРО-ДПМНЕ и ДУИ.

Социјалдемократите ќе тргнат од врата на врата во деновите по митингот во Битола, што треба да се одржи на 29 септември (за овој викенд се најавени митинзи во неколку помали општини), иако проектот „Работно лето“ официјално ќе заврши еден месец подоцна, со протест во Скопје.

Централниот одбор на СДСМ донел и одлука за конституирање на уште еден партиски совет - за образование, со кој ќе претседава професорот Зоран Поповски. Со тоа останува да се формира уште советот за здравство, велат од партијата. Со ЦО на СДСМ, пак, во наредните 12 месеци ќе претседава д-р Соња Георгиевска од Гостивар, бидејќи на досегашниот претседавач Хари Локвенец му истекол мандатот, а тој имал и други ангажмани како кандидат за градоначалник на Прилеп. (А.М.М.)