„Софра“ по десетти пат во Охрид

Штип – Од утре до недела во Извидничкиот центар во Охрид ќе се одржи јубилејна 10. меѓународната кулинарска манифестација „Софра“. Манифестацијата е во организација на Меѓународниот славјански институт „Гаврило Романович Державин“ од Свети Николе во соработка со амбасадата на Руската Федерација и Македонско-руската стопанска комора во нашата држава.

„Годинава своите кулинарски вештини на националните кујни ќе ги презентираат 14 екипи од Македонија, Русија, Србија, Хрватска, Бугарија, Шведска и Германија. Jадењата ги подготвуваат готвачи-аматери, што дава посебен шарм“, вели Ацо Стојанов, претседател на Организациониот одбор.

„За сите учесници најголемата придобивка е тоа што се запознаваат со националните кујни на други народи, си разменуваат рецепти, се договараат за учества на слични манифестации во земјите-учеснички“, вели Јордан Ѓорчев, директор на Меѓународниот славјански институт во Свети Николе и претседател на Сојузот на друштвата за македонско-руско пријателство. (И.Б.)