Краста е алтернатива за „Русино“

Просторот на дивата депонија во Тетово сега е празен, местото е дезинфицирано и се подготвува за облагородување

Тетово - Месноста Краста треба да биде алтернатива за регионалната депонија „Русино“ кај Гостивар, одлучи Полошкиот плански регион. Одлуката е базирана на неколку причини.

„Депонијата ’Русино‘ е дадена под концесија за други намени, а не за складирање смет. Концесионерите бараат да престане натамошниот дотур на ѓубре од сите полошки општини. Сега сме определени регионална депонија да биде месноста Краста, кон која ќе се изгради пристапен пат од магистралата Гостивар – Кичево, во должина нешто повеќе од два километра. Во тек се испитувања на теренот, по што треба да добиеме и помош од Министерството за животна средина и просторно планирање и од Владата. Депонијата ќе се гради според утврдени стандарди“, рече градоначалникот на Тетово, Сади Беџети.

Тој појасни дека доколку произлезат некакви проблеми со новата локација за регионална депонија, проблемот ќе си го решава секоја општина за себе. Според него, најважно е што граѓаните на општина Тетово веќе нема да имаат проблем со отпадот.

Досегашната дива депонија која се наоѓаше во близина на автобуската и железничката станица во Тетово сега е празна површина. На тој простор е извршена дезинфекција, а комуналците вршат дотур на песок и чакал онаму каде што ќе бидат оформени патеките, како и ровка земја на местата на кои треба да се сади трева и украсни дрвја.

Новата претоварна станица се наоѓа во близина на локалниот пат за селото Брвеница. Овде се носи градскиот отпад, а потоа со посебни тешки возила се изнесува за „Русино“. Преносот се врши уште во текот на денот. Германската компанија „Хинкел“, која е вклучена во пилот-проект за Мала Речица, веќе го презема и Тетово. Во објектот што сега е изнајмен за претоварна станица, се најавува дека ќе се врши рециклирање на отпадот, а во регионалната депонија ќе се носи само неупотребливото ѓубре собрано низ градот. (Г.Е.)