Се' поскапува, за еден месец кошничката потешка за 800 денари

Минатиот месец кошничката на „Утрински“ тежеше 4.177, а сега истите производи чинат 4.956 денари, или 18,6 отсто повеќе за само еден месец

Маја Томиќ
Сања Наумовска


Зеленчукот и овошјето поевтинија. Млекото и млечните производи се поскапи во споредба со минатиот месец. Тропското овошје ги задржа истите цени како и во април, додека за 20 до 50 проценти паднаа цените на јаболката, краставиците, компирот и кромидот, што вообичаено се случува по велигденските празници и во почетокот на пролетната сезона на свежиот зеленчук и овошје. Од друга страна, пак, тестенините, кафето, зејтинот, млекото и производите од млеко се продаваат поскапо за 3 до 60 денари. Големо покачување на цената има кај бисквитите „домаќица“, од 84 на 98 денари, кај мешаното сирење „здравје“, кое поскапело од 239 на 252 денари за еден килограм и овчиот кумановски кашкавал, од 395 на 454 денари. Овој месец има повисока цена и балансираната сол на „Алкалоид“, која сега се продава за 84 денари, а во април чинеше 78. Додека повеќето од цените се зголемени или се на истото ниво, по велигденските празници забележително е дека цената на јајцата се врати на старо, односно сега е пониска отколку во април. На исто ниво се задржаа цените на месото и на средствата за хигиена, од кои дел се намалени привремено, односно се продаваат во акција на супермаркетот „Веро“.

„Утрински весник“ од минатиот месец почна да прави свое истражување за движењето на цените, односно за поскапувањата. За таа цел на почеток на секој месец ги регистрира цените на основните животни продукти во маркетот „Веро“ и ги споредува со претходниот месец. Нашата листа е направена од 35 производи, при што од секој од нив има по еден килограм или литар. И кога ќе се собере нивната вкупна вредност, излегува дека потрошувачката кошничка за мај тежи 4,956 денари, наспроти 4,177 денари колку што вредеше во април. Значи, ако минатиот месец нашата кошничка чинеше околу 70 евра, сега изнесува околу 82 евра, или е зголемена за 18,6 отсто за еден месец.

Притоа треба да се има предвид дека оваа сума е добиена од по еден килограм или литар. А, многу разбирливо е дека за едно четиричлено семејство, за да се прехрани во месецот му се потребни многу повеќе килограми месо, сирење и литри млеко и јогурт, како и повеќе средства за хигиена отколку што ги содржи табелата.

Со оглед на тоа што вредноста на кошничката расте, односно за истите пари можат да се купат помалку производи, граѓаните ќе бидат принудени да купуваат помалку.

Но, каде се другите трошоци ако се има предвид дека за намирување на трошоците за домување, или просто кажано, за сметки, одат меѓу 100 и 150 евра месечно во просек. Што значи дека со една реална плата од 200 евра, не според статистиката која вели дека таа изнесува 340 евра, речиси е невозможно да се протурка од први до први следниот месец.

„Не многу одамна со 500 денари во џеб, можев да испазарам производи за два-три дена. Сега со истите пари излегувам од маркет со речиси празна кеса и се чудам како ми оди целата плата за храна и за режиски трошоци и ја трошам за половина месец. Тоа и не треба да ме чуди. Цените постојано растат, а платата ми е со години истата“, вели скопјанката Мирјана Ј..

Освен што граѓаните секојдневно на своја кожа го чувствуваат налетот на цените, односно инфлацијата, и Државниот завод за статистика со своите најнови податоци потврди дека трошоците на живот секој месец растат, додека просечните плати речиси една година не мрднале над 350 евра. Тие во април биле за 2,2 отсто повисоки од април минатата година, но од декември минатата година, значи за само 4 месеци, скокнале за 3,3 отсто. Тоа најмногу се должи на зголемување на трошоците за домување за 5 отсто и на станарина, водата и услугите за 2,7 отсто. Или истите овие трошоци за последните 4 месеци се повисоки за 2,3 отсто. Покажаната инфлација најмногу е резултат на ланскиот пораст на цените на парното, струјата, горивата, транспортот и храната. Од лани декември до крајот на април цените на храната скокнале за 3,6 отсто, а во споредба со април минатата година статистиката не регистрира пораст.