ТВ-Фотелја

Ден без А1

Роберт Д. Крстевски

Вселената си остана таква каква што е, со сите досега познати галаксии, планети, нивни сателити, комети, црни дупки и други небески тела. Земјата продолжи да се врти околу својата замислена оска. Сонцето, како и секогаш, изгреа на исток. Денот, како и секој друг, имаше точно 24 часа, 1.440 минути и 86.400 секунди. Ниту помалку ниту повеќе.

Во Македонија секој си бркаше своја работа. Некој в градинка, друг на училиште или на факултет, трет на работното место. Едни правеа ајвар, други се снабдуваа со дрва за огрев, трети пазареа. Кој со семејството на ручек, а кој, богами, со љубовницата на кафе или во мотелска соба...

Сумирано, на 4 октомври ниту се случи нов биг-бенг, ниту дојде крајот на светот, ниту се појави Месијата, како што можеби очекуваше или посакуваше еден друг, локален месија. Се случи само црн екран на фреквенцијата на неговата телевизија А1, со објаснување со бели букви дека 24 часа нема да се емитува програма поради исто толку долгата забрана за рекламирање, изречена од Советот за радиодифузија. Вистинскиот мотив за потегот без преседан во македонскиот радиодифузен простор на јавноста и' го соопштија наредниот ден: „Темниот екран што зрачеше од телевизија А1 е симболичен израз за состојбата на демократијата во земјава и за односот на институциите кон таа состојба“.

Апсолутно немам намера да спорам со ваквиот став, бидејќи секој има право на став за кое било прашање, но истовремено секој одговара за последиците кога ќе преземе радикален чекор поради свртување на вниманието на јавноста кон неговиот став. Колку што знам, и други ТВ-станици биле санкционирани од Советот за радиодифузија, па на ниту една од нив не и' паднало на ум да постапи како А1.

Што, всушност, доби телевизијата со тоа што ги остави своите гледачи еден ден без програма? Освен што беше топ-тема тој ден, ништо посебно. Во стилот на народната - секое чудо за три дена, интересот за случајот спласна исто толку брзо колку што се наметна во јавноста, бидејќи го потиснаа други актуелни собитија.

Од друга страна, А1 изгуби многу. Прво, излезе несериозен партнер пред коминтентите што се огласуваат преку неа, кои веќе не се сигурни дека нема и друг пат телевизијата да направи испад, оставајќи ги еден ден без емитување на нивните реклами. Второ, практично, ги казни своите гледачи, кои еден ден беа принудени да следат други канали или воопшто да не гледаат телевизија. Трето, и најважно, борбата за менување на состојбата со демократијата во државата не се води така што прво ќе си пукаш во сопствената нога, туку токму со користење на телевизијата како докажано најмоќен медиум на денешницата, заедно со Интернетот.