Потрагата по убијците испровоцира протест. Дали терористите подготвувале и други напади во Скопје

Косовскиот министер на полицијата вети дека бегалците ќе бидат уапсени доколку се во Косово

Горан Адамовски


Колку време дваесетчлената група уапсена за тероризам, го подготвувала петкратното убиство кај Смилковци? Дали пред да биде разбиена, подготвувала нов напад и злосторството што ќе ја потресе државата? Кој ги помагал финансиски и логистички? Ова се дел од прашањата на кои работат истражните органи по акцијата „Монструм“. Продолжува потрагата по двајцата осомничени за кои полицијата тврди дека директно ги извршиле убиствата, по што побегнале во Косово. Тамошните власти вчера ветија дека ќе бидат уапсени, доколку бидат лоцирани на нивна територија.

Од МВР велат дека во оваа фаза од истрагата, не можат ниту да ги потврдат ниту да ги демантираат гласиштата дека радикалната група подготвувала и други напади.

„Се' уште се работи на тоа да се утврди колку членови имале, кој ги поддржувал и слично. За петмината осомничени имаме цврсти докази дека директно учествувале во злосторството, но истрагата ќе трае се' додека не се утврдат сите детали од случајот“, вели Иво Котевски, помошник-министер за односи со јавности при МВР.

Дел од осомничената петорка и порано се судрувале со законите во случаи како насилство или недозволено поседување оружје. Според информации од истрагата, еден од бегалците, Алил Демири (27) веќе бил осуден на тригодишна затворска казна поради насилство. Медиумите на албански јазик вчера објавија дека тој моментално се наоѓал во Шпанија и наводно, при контакт со семејството, рекол дека не е виновен и оти ќе се врател во земјава за да го докаже тоа. Освен за него, меѓународна потерница е распишана и за Африм Исмаиловиќ (32), ��ој заедно со брат му Агим (33) се осомничени дека со две автоматски пушки и еден пиштол, стрелале во жртвите. За да побегнат од земјава, како што беше соопштено, им помогнале Фејзи Азири (54) и Рами Сејди (24), кои се во притвор. Косовскиот министер за внатрешни работи, Бајрам Реџепи, нагласи дека доколку се утврди дека осомничените се кријат во Косово - ќе бидат уапсени.

„Тоа е врз основа на протоколот за соработка на полициите на двете земји. Двете полиции ќе соработуваат за да се расветли случајот“, изјави Реџепи.

Во меѓувреме, македонската полиција собира нови докази и го вештачи пронајдениот материјал во акцијата „Монструм“. За надлежните нема дилеми: петкратното убиство на 12-ти април, во кој настрадаа Александар Наќовски, Цветанчо Ацевски, Кире Тричковски, Филип Славковски и Борче Стефковски, го испланирале и извршиле исламските радикали од Скопје. Прецизно бирајќи го денот, начинот и последиците кои би можеле да следат, пукале во жртвите, без да имаат никаква поврзаност со нив. Целта им била да предизвикаат страв и несигурност на населението.

Стеjт департмент

Да биде задоволена правдата

Американскиот Стејт департмент апелира да се испочитува законскиот процес, за да биде задоволена правдата во случајот со петкратното убиство крај Смилковското Езеро.

„Очигледно, следиме како се развива истрагата, но само повикуваме на сите осомничени за ова ужасно убиство, без оглед на нивниот идентитет, етничка припадност или верисповед, да им биде овозможен процес согласно законите и на крајот да се обезбеди дека ќе биде задоволена правдата“, изјави портпаролот Марк Тонер на редовен прес-брифинг во Стејт депарментот, одговарајќи на прашање на Гласот на Америка - дали САД имаат информации за закана од радикалниот ислам во Македонија, а во контекст на наводите на министерката за внатрешни работи Гордана Јанкулоска, дека некои од уапсените се негови следбеници и војувале на страната на Талибанците против НАТО во Авганистан и Пакистан.

Тонер кажа и дека Амбасадата на САД во Скопје внимателно го следи случајот.

Реакциjа од Албаниjа:

Убиството да не се гледа од етничка перспектива

Шефот на албанската дипломатија апелира убиството кај Смилковци да не се гледа од верска и етничка перцепција.

„Албанија поддржува целосна, точна, законска и праведна истрага, во врска со масакрот кај Смилковското Езеро, со цел оние кои се виновни да ја добијат казната што ја заслужуваат“, изјавил албанскиот министер за надворешни работи и вицепремиер Едмонд Хаџинасто, пренесуваат албанските медиуми.

Тој упатил апел за воздржаност. „Грозоморното убиство да не се гледа од верска и етничка перцепција, зашто криминалците се само криминалци“, истакнал Хаџинасто.