Во Тетово пробиен полицискиот обрач

Тетово - Учесниците на протестот во Тетово, на улицата „168“ во Мала Речица, која е на стотина метри од седиштето на ДУИ, насилно го пробија полицискиот кордон и продолжија да се движат кон партијата на Али Ахмети. Тоа практично значеше дека ситуацијата со учесниците во толпата излегува од контрола. Непосредно пред ДУИ повторно беше поставен полициски кордон, каде околу 600 учесници на протестот не се ни обидоа да влезат во просториите на партијата. Нивниот револт беше изразен со извикување: „Али не ја продавај крвта на Албанците“. Овде беа истакнати и неколку транспаренти на кои пишуваше „Стоп за националната и верската дискриминација“, „Стоп на монтирани судски процеси“ и други.

Протестот во Тетово започна нешто пред 14 часот на плоштадот „Илирија“, каде беа собрани околу 200 протестанти. На чело на колоната имаше три-четири знамиња на Албанија и едно со зелена боја, како исламско, со испишан текст на арапски јазик. Толпата се движеше по булеварот „Илинденска“. Најнапред застанаа пред судската палата, а потоа кај Шарената џамија. Следна нивна дестинација беше седиштето на Демократската унија за интеграција. Движејќи се по улиците на Тетово, учесниците во толпата најмногу извикуваа „Етничка Албанија“, „УЧК“, „Господ е голем“, „Илирида“. Во одделни моменти ќе се слушнеше „Ние не сме терористи“, „Не сме радикалисти“, „Јанкуловска е терорист“, „Долу Влада“. Движејќи се по булеварот „Илинденска“, повремено се слушаше вообичаената муслиманска молитва која најчесто се слуша во џамиите за време на верските обреди.

Протестот во Тетово мина без некои посебни последици. Траеше нешто повеќе од еден час. Пред ДУИ, на повик на одделни највлијателните меѓу водачите, учесниците на демонстрациите мир��о се разотидоа.

На протестот не забележавме официјални личности на политички партии. Имаше поединечно присуство на верски достоинственици. Инаку, меѓу демонстрантите доминираа млади луѓе. (Г.Е.)