Градоначалничката функција предизвик за пратениците

Зошто народните избраници ги ризикуваат удобните собраниски клупи, обидувајќи се да станат први луѓе во своите општини

Горан Адамовски



Битолчанецот Менде Диневски реши да ја ризикува својата пратеничка функција и да се обиде да стане градоначалник во родниот град. Социјалдемократите проценија дека тој е човекот што би можел да им донесе победа во „градот на конзулите“, каде што во два мандати владее ВМРО-ДПМНЕ. Триесет и деветгодишниот стоматолог е свесен дека го чека тешка задача, но порача оти првата работа што ќе ја направи доколку победи на локалните избори, закажани за пет месеци, ќе биде целосна ревизија на работењето на актуелниот градски татко Владимир Талески и неговата екипа. Најавува дека гасификацијата на Битола ќе биде приоритет.

Диневски е еден од политичарите кои во изминатите години се обидоа да направат пратеничко-градоначалничка рокада. Некои од нив успеаја, други се вратија во собраниските клупи.

„Да се биде прво човек на главниот град беше голем предизвик за мене“, се присетува лидерот на НСДП, Тито Петковски. Тој пред четири години се обиде да стане градоначалник на македонската метропола, но ја загуби трката од Коце Трајановски.

Петковски објаснува дека градоначалничката функција е мошне одговорна работа, која бара знаење и организациски способности. Таа позиција, според него, дава шанса, со своите лични квалитети, да направиш многу за местото во кое живееш. „Особено што добиваш можност да не се затскриваш зад партијата која те кандидирала за функцијата“, вели Петковски.

Претходникот на Коце Трајановски, бизнисменот Трифун Костовски, објаснува оти во неговиот случај логиката била многу едноставна. Тој се откажал од пратеничка функција, за која признава дека била многу комотна, од причина што како независен пратеник не можел многу да смени и да придонесе да се забрзаат процесите во законодавниот дом.

„Градоначалничката функција е поголем предизвик од пратеничката за човек што сака нешто да сработи. Никогаш не сум се водел од лукративни причини. Секогаш гледав што можам да направам и се фатив со жива материја, во еден град во кој дневно циркулираат еден милион граѓани. Тоа е предизвик и за луѓе што сакаат да просперираат во општеството, оти многу поприроден начин е да се успее преку непосредни избори“, ни изјави Костовски. Напоменува дека имало и обратни примери, кога градоначалници се откажуваат од функцијата за да станат пратеници, што, според него, е многу чудно. За своето градоначалникување вели дека е единствен градски татко што оставил полна каса зад себе.

Ако им се верува на гласиштата, пратеникот Веле Ѓорѓиевски од ВМРО-ДПМНЕ ќе се обиде да победи во скопска Кисела Вода, која барем досега важеше за вмровска општина. Јавноста памети и дека неговата сопартијка Силвана Бонева, пред три години му се спротивстави на Зоран Заев во Струмица, но доживеа пораз. И Заев пред да стане градоначалник беше пратеник во законодавниот дом.

Низата примери ќе се зголемат како што ќе се ближи драматичниот март. Секој со своите причини и воден од своите мотиви, но заедничко за сите е што во зависност од сработеното, остануваат врежани во колективната меморија на граѓаните.