Кој ќе трча за ВМРО-ДПМНЕ напролет

Скопје е клучот, важно е да се победи во поголемите градови и во општините каде што владее СДСМ

Горан Адамовски



Главно, со проверени кадри, но и со по некое изненадување, ВМРО-ДПМНЕ ќе се обиде да ги добие и наредните локални избори, закажани напролет. Во владејачката партија траат конкурсите за градоначалници што завршуваат на 1 септември, по што ќе се знаат имињата што ќе излезат на терен за да ги придобијат гласачите. Како по обичај, акцентот ќе биде фрлен на Скопје, кој по многу нешта ќе го одреди севкупниот победник на изборите, може да биде увертира на предвремени парламентарни избори, но и ќе даде (или одземе) легитимитет на контроверзниот проект „Скопје 2014“. Освен во метрополата, интересни битки, во кои вмровците очекуваат уште еден мандат за своите луѓе, се очекуваат во поголемите градови Битола, Велес, Прилеп, Штип, Гевгелија... а посебен предизвик се четирите општини во кои СДСМ е на власт: Охрид, Карпош, Куманово и Струмица.

Поради летните одмори, празно е во општинските комитети на партијата на власт. Ќе помине понекој член, симпатизер или граѓанин, но конкретни разговори околу кандидатите нема да слушнете.

„До 1 септември нема ни да има ништо. Кога ќе завршат конкурсите - тогаш“, велат членови на партијата.

Голем дел од актуелните градоначалници веќе јавно признаа дека ќе побараат уште еден мандат, а таму каде што се молчи, проговори чаршијата. Ако им се верува на гласиштата, тогаш Коце Трајановски повторно ќе биде скопскиот адут на ВМРО-ДПМНЕ. Неговата победа се смета за клучна за да може да се заокружи проектот „Скопје 2014“. Актуелниот градоначалник на Аеродром, Ивица Коневски, судејќи според расположението на граѓаните, може да смета на триумф доколку оди на втор мандат, што не може да се каже и за првиот човек на Кисела Вода, Марјан Ѓорчев. Ќе се види како тука ќе одигра ВМРО-ДПМНЕ, а неизвесно ќе биде и во Центар и во Карпош. Градоначалникот на Центар, Владимир Тодоровиќ, наводно, нема расположение да продолжи да се занимава со политика, но конечниот збор ќе го има партијата. Во Карпош, пак, исплива името на поранешниот директор на Лотарија и на Зоолошката градина, Дане Кузмановски. Според шпекулациите, тој би се нафатил доколку противкандидат му биде Стевчо Јакимовски, бидејќи сакал предизвици. Ако актуелниот градоначалник на Карпош учествува во трката за Скопје, тогаш ВМРО-ДПМНЕ во Карпош ќе оди со Сашо Лазаревски, заменик-министер за локална самоуправа. Секако, ова се само шпекулации, исто како и муабетите дека Сокол Митревски од Ѓорче Петров сака уште еден мандат.

Битолскиот градоначалник Владимир Талески веќе најави дека сака да оди на уште едни избори, а истото тоа се очекува и од неговиот колега од Прилеп, Марјан Ристески. Како што објавивме пред дваесетина дена, речиси целиот источен регион сака уште една доверба од граѓаните. Градоначалниците на Пехчево и на Радовиш, Јованчо Станоевски и Роберт Велков, задоволни од тоа што го направиле за своите места, бараат трет мандат. Првиот човек на Штип, Зоран Алексов, градоначалник на Штип, смета дека градот не е ист како кога дошол на функцијата, па и тој сака да остане во градоначалничката фотелја. Исто размислува и гевгелискиот градоначалник Иван Франгов.

Местата каде што владее СДСМ се високопоставени на приоритетните листи на ВМРО-ДПМНЕ. И додека во Струмица, реално, мали се шансите некој да му ги помрси сметките на Зоран Заев, во Куманово, а особено во Охрид, каде што се очекува ВМРО-Народна, која има голем број приврзаници, да му даде поддршка на Александар Петрески, ќе биде жестоко. Јавноста веќе калкулира дека Александар Николовски или Цветко Грозданов ќе одат во битка со Петрески. Во Струга и во Кичево се прават предизборни математики, дури и се зборува за соработка со СДСМ, но до тоа тешко ќе дојде. Во Гостивар и во Тетово сигурно ќе се оди со свој кандидат, но како ќе се игра во вториот круг, ќе зависи од евентуален договор со партнерот од власта - ДУИ. Што од ова е вистина, ќе се знае од септември.