Мое ќоше

Отворено писмо до Груевски

Ерол Ризаов

Запрете ја хајката на невини луѓе кои се жигосуваат јавно без судска пресуда

Почитуван премиер Никола Груевски, Вие со ловот на вештерки, што се одвива во организација на Вашата партија, сте најодговорен за ова лудило и сеирџиство што ја заплиснуваат Македонија со ужасен цунами од примитивизам и ниски страсти. Државата на чие чело сте Вие се претвори во Кодошистан со Ваш амин. Запрете ја оваа хајка на невини луѓе кои вашите послушници секој ден ги бесат на столбот на срамот. Со Законот за лустрација, изгласан само од власта, спротивен на универзалните принципи на правото уште од времето на Римската Империја кога е поставена основната правна норма: тужителот ја докажува вината, а не обратно, обвинетиот да докажува дека е невин, Вие инсталиравте инквизиција која прво пресудува и јавно жигосува, а потоа жртвата треба да докажува по судски пат дека е невин. Вакво право има само во најцрните режими и диктатури.

Создадовте во земјата амбиент на страв и омраза кога некомпетентни партиски луѓе читаат извештаи на тајната полиција од пред речиси 70 години и се надгласуваат кого ќе изнесат како кодош пред судот на јавноста. И еве ги обелоденија првите 25 наши сограѓани како прва тура за масовно просветлување, што треба сите да не' прочисти и да ни олесни да одиме напред. Не знам Вам, премиере, ама мене ова не ми личи ни на прочистување ни на олеснување, туку на голема валкана игра со тешки последици врз здравјето на нацијата која не не' носи напред, туку не' враќа далеку назад.

Почитуван премиере, морате со свои очи да ги погледнете гревовите на овие 25 новомаченици. Дури и да прифатиме дека се' е точно што напишале агентите на УДБА и Државната безбедност, иако оваа работа е единствена на која вие гледате со почит и доверба од она што е останато од комунизмот, лесно ќе видете дека покрај лаги, станува збор за бесмислици и изнасилени констатации, па дури и детски наивности. Какво е тоа прочистување господине Груевски ако Кирил Псалтиров треба да оди курбан како вмровец само да се каже дека еве ги лустрираме и нашите. Па што направило тоа 18-годишно момче во Кочани кога наивно се зачленило во организација за обединување на Македонија. И што ако полицијата не ја откриеше таа организација, сигурно досега Македонија ќе беше обединета. И што направил Кирил откако го затвориле, му удриле ќотек, го викнале татко му и го врбувале да биде кодош. И што згрешил Кирил. Не бил херој, прифатил соработка, па го предал некојси „Млин“ дека ја скршил сликата на Тито. Тоа ли откритие ќе не' прочисти господине премиер. Момчето заминало војска и по една година тајната полиција го отфрлила како непотребен. Тоа ли е страшниот грев на луѓето кои на 17 и 18 години биле врбувани, или негде се зачлениле верувајќи дека работат за татковината. Тие луѓе ли денес ќе ги жигосуваме пред јавноста, пред нивните семејства и деца. Тоа ли се големите злодела за некој да го каменуваме јавно. Премиере, срамота е ова за целата држава, а најголема лично за Вас. Ве молам, прочитајте го гревот на Коста Балабанов, прочитајте го досието на Владимир Милчин, видете ги гревовите на Трендафил Ивановски, на Данчо Чеврески и на сите досега спектакуларно откриени 25 македонски душмани. Тие ли денес ја задушуваат македонската демократија или Вие и Вашата власт која на овој начин линчува без судска пресуда луѓе нанесувајќи им голем срам.

Почитуван премиере, блиску е до здравиот разум ако оваа власт, единствена од сите држави кои произлегоа од бивша Југославија која воведе ваква лустрација, навистина сака нешто да направи на тој план, тогаш нека тргне по некои приоритети. Но, очигледно со одредување на приоритетите имате проблем. Тешко е да се разликува поважното од помалку важното кога не носи еднакво гласачи. Ако вистински сакаме прочистување, тогаш приоритет број еден е да се провери минатото, пред се', на актуелните функционери. Колку повисока позиција, неопходна е построга истрага. Потоа би морало да следува преиспитувањето на периодот на Информбирото и луѓето кои невини страдаа од големиот прогон, наводно, како сталинисти. И конечно, од перидот на дејствувањето на државната безбедност. Да одиме со ред: од високите актуелни политички функционери според досега сработеното нема ниту еден кодош. Од најмрачниот период на комунизмот кога стот��ци невини луѓе заминаа на Голи Оток нема ниту еден кодош. Кој ги нарача судските процеси на Ченто, Шатев, Брашнаров и на плејада македонски интелектуалци и револуционери. Кој ги судеше, дали беа тоа монтирани процеси, кој ги накодоши тие луѓе. За тоа се' уште нема ниту едно име. Како што нема ниту едно име за најновите нарачки против познати македонски дејци и творци. Ако се почитува правото, потребни се нови непристрасни судски процеси кои ќе водат кон судска, политичка и творечка рехабилитација на жртвите и кон обесштетување на семејствата. За ова не е потребен нов закон. Тоа право го даваат постојните закони, но очигледно нема политичка волја кај Вас за рехабилитација на жртвите како што има мотив за пресметка со кодошите.

Почитуван премиере, од сето ова нема ништо освен налудничав театар. Луѓето кои се огрешиле за време на Информбирото или се одамна починати или се во длабока старост како и нивните жртви. Сега страдаат невини луѓе, или луѓе чии гревови не се од таа природа да се прави хајка и атмосфера на линчување. Искористете ја еднаш вашата моќ во правилна насока и запрете го ова лудило. Бидете сигурни дека ова што денес се прави во Македонија ќе биде многу бргу предмет на нова лустрација за периодот на 2012 година кога невини луѓе јавно се жигосувани без судска пресуда. Тоа не може да помине без казна.