Поглед

Појадокот на Коце во опасност

Наум Котевски

Истражувањето на европското јавно мнение по барање на Европската комисија, Евробарометар, на овдешните песимисти и квазиреалисти им кажа, како разбеснет ограбувач на кротка банкарска службеничка, да затворат уста и да не пискаат. Бидејќи анкетата покажа дека 64 отсто од граѓаните на Македонија, генерално, се задоволни од својот живот. Фантастична бројка. Како Усеин Болт трчаме кон срамниот број. Тогаш за разлика од сега, веројатно, ќе биде задоволството двојно и за оние што ја водат државата и за водените.

Извонредно тешко ќе им биде сега на социолозите да ни објаснат зошто речиси две третини од граѓаните во земјава признале дека навистина не знаат што е леб, бидејќи контра светскиот анорексичен амбиент, лапаат само кавијар, а така се хранат и кога одат на одмор по егзотичните места по месец, два, три. Оние што вртат околу своите згради, како некое јадно куче етопат, или оние што заминале со тешка мака некаде колку да се разладат и се враќаат по 10 дена, тоа не го правеле затоа што немаат пари, туку дека не можеле долго да егзистираат без овдешниот рај.

Нуркачите по контејнери да ти биле измислена категорија, а не постои ниту „средната класа“ која е на две: дали да се пресрами и да влезе во лимениот базен или да си го чува образот како најголема светост.

По овие податоци кои можеби се последица на нашата високоразвиена демократија во која си мисли кој што сака го молиме МВР кое знае да се пофали за секоја фатена таблетка екстази да и' каже на јавноста за своите претпоставки колку халуциногена стока е можно да останала во државава. Ќе да е на тони.

И еден најдобронамерен совет до градоначалникот Коце Трајановски добро да размисли дали во септември на Мала Богородица ќе го организира појадокот на Камен мост. Постои страшна опасност пред избори да се посрамоти и никој да не му дојде.