17.02.2012, 10:17 Kоординација кај Иванов во пресрет на посетата на Нимиц
Кабинетот на претседателот соопшти дека координацијата е свикана во врска со текот на разговорите за надминување на спорот со Грција околу уставното име на Република Македонија.
Претседателот Ѓорге Иванов за денеска напладне во претседателската вила „Водно“ закажа координација на државниот врв во пресрет на посетата на посредникот на Обединетите нации Метју Нимиц, кој во понеделник ќе дојде во Скопје.
Кабинетот на претседателот на РМ соопшти дека координацијата е свикана во врска со текот на разговорите за надминување на спорот со Република Грција околу уставното име на Република Македонија, што се водат под покровителство на ОН.
На состанокот ќе присуствуваат претседателот на Собранието на Република Македонија Трајко Вељаноски, претседателот на Владата Никола Груевски, заменик-претседателот на Владата Муса Џафери, министерот за надворешни работи Никола Попоски и амбасадорот и специјален пратеник во разговорите за името Зоран Јолевски.
Претседателот Иванов, најавувајќи ја средбата на државниот врв, во вторникот изјави дека Македонија има јасна позиција и е конструктуивна во процесот за решавање на прашањето за името, и очекува и од другата страна да види посветеност за да се дојде до решение.
- Позицијата на државата е јасна. Тоа што ние го правиме очекуваме да го видиме и од другата страна. Иако со оглед на ситуацијата во Грција не гледам некој кој со ист интензитет и иста посветеност како нас приоѓа на проблемот што тие го создадоа, рече Иванов при посетата на Демир Капија.
Посредникот Нимиц на 20-ти и 21 февруари ќе престојува во Македонија, а на 22-ри ќе ја посети Атина.
|
