Полицајците ќе возат „шкода јети“ или „сеат алтеја“

Цената игра најважна улога. Кој ќе спушти помала цена - тој ќе го добие бизнисот, велат од МВР

Горан Адамовски

„Шкода јети“ или „сеат алтеја“ ќе возат полицајците откако само две компании се јавија на тендерот што Министерството за внатрешни работи кон крајот на март го распиша за набавка на нови 150 автомобили. Досегашните „крајслери“ трошеле многу и бргу се расипувале, поради што беше неопходна замена. Заинтересирани за бизнисот се „Порше Македонија“ и „КА-ДИС“. Понудите беа отворени денеска и во наредниот период ќе следи нивна анализа и оценување дали ги исполнуваат условите на огласот.

„Доколку тоа се потврди, заинтересираните ќе бидат изве��тени за терминот на јавното наддавање, бидејќи единствен критериум по кој ќе се одбере новото возило на македонската полиција ќе биде понудената цена“, соопшти МВР.

„Шкода јети“ 2.0 ТДИ 4x4, предлог на „Порше Македонија“ е моќно возило, кое може успешно да се снајде и на асфалт и на терен. Со дизел-мотор и високо ниво на опременост може да достигне максимална брзина од 190 километри/час. Според податоците на интернет, просечната потрошувачка е малку над шест литри. Во зависност од моторот (со 140 или со 170 коњски сили), погонот и нивото на опрема, цената се движи околу 20.000 евра, па нагоре.

„Сеат алтеја“ Freetrack 2.0 CR 4WD е фаворитот на „КА-ДИС“. На интернет може да се прочита дека ова силно возило има одлични перформанси, троши околу 5,5, литри гориво на 100 км, достигнува брзина до 204 км/час, а во зависност од опремата, моторот (140 или 170 коњски сили) и погонот, за ова возило треба да се издвојат околу 25.000 евра, па и повеќе.

Секако, цените што може да се најдат на интернет не мора да бидат оние со кои скопските фирми ќе се обидат да постигнат договор со МВР.

Како што веќе пишувавме, МВР се одлучи на замена на „крајслерите“ поради годишните трошоци за амортизација, кои чинеле и до 7.000 евра. Вкупно 210 „крајслери“ и 30 теренски џипови со бензински мотор беа набавени во 2000 година. Автомобилите, кои трошат 14 литри гориво на 100 километри, досега минале над 500.000 километри.

Освен за возилата, во тек е тендер за купување блиндиран автомобил, кој МВР ќе го чува за посебни пригоди. Министерството сега располага со две блиндирани возила, кои во голема мера се амортизирани. Последен пат вакво возило била набавено пред 12 години.