Го нема оружјето со кое е пукано во жртвите

Недостига еден од клучните докази, но Јанкулоска уверува дека и без тоа, имаат цврсти докази против уапсената група

Горан Адамовски



Во големиот арсенал оружје што е запленет по апсењата на групата осомничена за убиствата на петмината рибари кај Смилковското езеро, ги нема двете автоматски пушки и пиштолот со кој што беше стрелано во жртвите, потврди вчера министерката за внатрешни работи, Гордана Јанкулоска.

Вештачењата во МВР покажаа дека недостига еден од клучните докази за истрагата, но надлежните уште пред неколку дена најавија дека и без оружјето, имаат цврсти докази дека егзекуцијата на недолжните скопјани го извршиле уапсените исламски радикали. Цврсти докази виде и Обвинителството, кое најави дека ќе побара максимална казна, односно доживотен затвор за сторителите на убиствата.

Премиерот Никола Груевски, коментирајќи го протестот по апсењата на осомничените, завчера рече дека „наскоро ќе почне судската расправа и ќе се обелоденат доказите“.

„Луѓето ќе разберат дека станува збор за сериозни докази. Не станува збор за етничка работа, затоа што убиство е убиство, независно кој го извршил и не може да се оправдува“, изјави Груевски.

Во меѓувреме, продолжува собирањето материјали, кои можат да помогнат во докажувањето нивна вина. Со помош на Интерпол и службите од регионот, се очекува лоцирање на двајцата бегалци, Алил Демири (27) и Африм Исмаиловиќ (32), осомничени дека заедно со Агим Исмаиловиќ (33) стрелале во жртвите. Потоа, со помош на Фејзи Азири (54) и Рами Сејди (24), побегнале во Косово. Каде се тие - се' уште не се знае. Медиумите на албански јазик објавија дека Демири се наоѓал во Шпанија, и наводно, при контакт со семејството, рекол дека не е виновен и оти ќе се врател во земјава за да го докаже тоа. Од МВР, велат дека ако е точно дека се криел во Шпанија, тогаш го охрабруваат Демири да се врати во Скопје и да се соочи со доказите за негова (не)инволвираност.

Во морето шпекулации, се' погласни се гласиштата дека групата планирала напади и врз други објекти во Скопје, наводно биле најдени и скици, но властите повторуваат дека во овој дел од истрагата не можат да коментираат дали има вистина во тоа. Молк и околу прашањата колку време било планирано петкратното убиство кај Смилковци, односно кој ја помагал финансиски и лобистички дваесетчлената група осомничена за тероризам.