(ФОТО) Кампањата на Макрадули како претседателската на Пахор

Кандидатот на СДСМ за градоначалник на Скопје, во обид да ги придобие граѓаните, ќе менува светилки, ќе чисти снег, ќе продава костени..

ФОТО: Киро Попов

Неформална и теренска кампања, базирана на непосредни средби со скопјани, главно, ќе води кандидатот на СДСМ за градоначалник на главниот град, Јани Макрадули. Тој денеска отвори канцеларија за идеи во центарот на Скопје, близу плоштадот „Македонија“ и го промовираше предизборното мото „За Скопје, сега“. И покрај опозициските најави за можен бојкот на изборите во март, Макрадули ја почна денеска и формално предизборната битка со актуелниот градоначалник Коце Трајановски, кому ВМРО-ДПМНЕ, деновиве, му даде доверба повторно да се натпреварува за главниот град.

Опозицијата, според наши информации, планира во Скопје да води кампања слична како таа на Борут Пахор, поранешен премиер на Словенија, кој минатиот месец победи на тамошните претседателски избори, како кандидат на Социјалдемократската партија. Така, Макрадули, на пример, ќе продава костени во центарот на градот, ќе работи на шанк во кафуле, ќе чисти снег и ѓубре, ќе менува светилки... Во активностите ќе му помага т.н. еколошка бригада, чии „припадници“ вчера, симболично, со зелен клуч ја отворија Канцеларијата за идеи.

Шеф на изборниот штаб на Макрадули ќе биде пратеникот Горан Минчев. Претседателската кампања на социјалдемократите во Словенија беше многу невообичаена, но оригинална и предизвика различни реакции во јавноста. Пахор, кому анкетите во почетокот не му беа наклонети, ја почна кампањата многу порано од официјалниот рок. Тој чистеше смет по улиците, продаваше цвеќе и зеленчук на пазарите, гаснеше пожари, беше фризер... На крајот се соочи и со пријави во трудовата инспекција за работа на црно, бидејќи, во текот на неформалната кампања, одработил цела смена во фабрика за чорапи и помогнал при асфалтирање пат.

Лидерот на СДСМ, Бранко Црвенковски, му изрази денеска поддршка на Макрадули. Претходно, учество во кампањата на кандидатот на СДСМ за скопски градоначалник најавија повеќе познати личности од јавниот живот - актери, пејачи, спортисти и новинари - Ѓокица Лукаревски, Атанас Костовски, Наталија Тодоровска, Бојана Атанасовска, Нора Шаќири, Кирил Колемишевски...

Лукаревски за оваа пригода ја испеа во своја верзија песната „Скопје радост ти ќе бидеш“, која ја преобрази во „Јани гордост ти ќе бидеш“. Зборовите на Шакири „Курбан-бајрам ти донесе победа, а Свети Никола ќе ти донесе победа“, го расплакаа градоначалничкиот кандидат на опозицијата. (А.М.М.)