Давутоглу: И за крајот на светот ќе одберев да бидам во Македонија

Шефот на турската дипломатија нагласи дека добрите партнерски односи меѓу Македонија и Турција ќе траат до крајот на историјата

Ако според календарот на Маите денеска требаше да се случи крајот на светот, јас ќе одберев да бидам тука во Скопје, Македонија, мојот дом. Овие 20 години од воспоставување на односите ќе ги продолжиме до крајот на историјата. Продолжуваме да бидеме партнери и сојузници. Ова го изјави министерот за надворешни работи на Турција Ахмет Давутоглу на заедничката прес-конференција во Скопје со неговиот домаќин шефот на македонската дипломатија Никола Попоски.

Давутоглу потсети дека во август 1992 година Турција беше првата земја која ��а призна Македонија под уставното име и оттогаш трае поддршката за нејзина интеграција во ЕУ и НАТО.

- Ние ќе продолжиме со оваа политика бидејќи веруваме дека стабилноста, просперитетот и безбедноста на Македонија е стожер на регионалната стабилност. Членството на Македонија во НАТО и ЕУ и другите меѓународни организации е од суштествено значење за регионот, рече Давутоглу.

Тој посочи оти Македонија со мултикултурниот, мултирелигискиот и мултијазичниот карактер е Балкан во мало и затоа сите соседни земји треба да ја поддржат.

Коментирајќи ги добрите односи меѓу двете земји, Давутоглу ја пофали Македонија за почитувањето и толеранцијата во однос на сите малцинства како пример на Балканот.

Ја потенцира и одличната културна соработка меѓу Анкара и Скопје за која мост на поврзување, рече, претставуваат турската заедница во Македонија но и големиот број на жители во Турција со потекло во Македонија.

- Ве уверувам дека турската Влада, премиерот, претседателот и 75 милиони Турци ги имате за свои пријатели и тоа пријателство ќе продолжи вечно. Моето присуство во Скопје денес е уште една потврда дека ние ќе продолжиме да ја поддржуваме Македонија секогаш и секаде, засекогаш. Стабилноста, просперитетот и безбедноста на Македонија е важна за нас како и нашата стабилност и безбедност, рече Давутоглу.

Министерот Попоски, пак, изрази уверување дека соработката со Турција како нова контакт-земја за НАТО за Македонија ќе продолжи за целосна интеграција на Македонија и на регионот и во Алијансата.

Тој се осврна и на економската соработка, оценувајќи оти дека сегашната размена од 400 милиони долари во следниот период ќе достигне една милијарда долари. Како многу значајна за натамошно уредување на културната соработка и размена меѓу двете земји го оцени и скорешното отворање на културно-информативни центри во Скопје и во Истнбул.

Турскиот министер за надворешни работи Ахмет Давутоглу синоќа имаше средба со макеоднскиот претседател Ѓорге Иванов, а претходно на Унивезтитет „Свети Кирил и Методиј“ му беше доделена титулата „почесен доктор на науки“. Давутоглу денеска треба да се сртене со претседателот на Собранието Трајко Вељаноски.