22.12.2012, 22:40 Пуштен во употреба целосно репариран воз на МЖ „Транспорт“
Министерот за транспорт и врски Миле Јанакиески денеска најави дека следната година ќе бидат набавени шест нови возови и оти ќе се продолжи со репарирање на веќе постоечкиот возен парк на АД „Транспорт“. Тој денеска заедно со директорите на МЖ „Транспорт“, Оливер Деркоски и на МЖ „Инфраструктура“, Ирфан Асани, ги користеа услугите на новиот целосно репариран воз кој сообраќа од Скопје до Битола.
- Наредната година ќе набавиме шест нови возови, четири дизел и два електро и ќе продолжиме со репарирање на веќе постоечките со цел возниот парк на АД „Транспорт“ да биде целосно реновиран и ставен во функција. Се работи за некаде од 12 до 15 вакви возови. Се надеваме дека тоа ќе го постигнеме до 2014-2015 година. Целокупната инвестиција е околу 100 илјади евра, рече Јанакиески.
Во целосно репарираниот воз на релацијата Скопје - Битола има нови мотори, нов под, седишта, инсталиран систем за видео надзор, противпожарен систем и систем за аудиовизуелна анимација на патници.
Министерот Јанакиески истакна дека од разговорот со патниците увидел дека во овој воз се нудат подобри услови бидејќи е целосно реконструиран.
- Ова е втор воз и, пред се, резултат на ентузијазмот и подобрата работа на новиот менаџерски тим во Акционерското друштво, рече Јанакиески.
Јанакиески рече дека средствата за новите возови се веќе обезбедени и оти во моментов се ангажира консултант кој ќе работи на тендерска документација.
- Во првата половина на следната година ќе се објави повик, а до крајот на наредната година треба да се склучи договор. Многу зависи од понудите, кои најдоцна во рок од две години треба да ги достават и потоа ќе се утврди кога ќе стигнат новите возови, појасни министерот.
Како студент, рече Јанакиески, често се возел со воз, а сега поретко. Според него, добра идеја е обновата на возовите, бидејќи билетите се поевтини и голем број граѓани ги користат возовите како превозно средство.
|
