Владата не отстапува, СДСМ подготвува жив штит

Дали денеска на седница на Собранието ќе биде поставен буџетот за идната година. Владата требаше да расправа. Политичката ситуација станува драматична

Татjана Поповска


Ќе се најде ли буџетот денеска на собраниска седница беше прашањето што вчера доминираше во политичките кругови, а на кое никој ниту од владејачкото мнозинство, ниту од опозицијата немаа конкретен одговор. Сепак, сите навестувања и од Владата и од опозицијата укажуваа дека за буџетот денеска ќе расправаат пратениците на собраниска седница, откако претходно за него по втор пат ќе се изјасни Владата.

Денеска е последниот термин кога за финансискиот план треба да почнат да дебатираат пратениците за да може до крајот на годинава да се усвои. За вчера од Владата најавија дека е можно доцна попладнето да расправаат за буџетот, но не сакаа да соопштат дали овој документ веќе е кај нив на финална корекција.

Од СДСМ предупредуваат дека ваквиот потег ќе значел директно уривање на Собранието и на парламентарната демократија и ќе предизвика сериозна политичка криза, бидејќи тие немаат намера да отстапат од планот за наредната година да се намалат трошоците за 204 милиони евра. Најавија дека нема да го напуштат парламентот, ќе се стационираат пред пленарната сала за да спречат расправа за буџетот. За синоќа закажаа итна седница на Централниот одбор на партијата, на која ќе се договори натамошната стратегија.

Доколку буџетот се најде денеска на пленарна седница, тоа значи дека ќе ги „прескокне“ Комисијата за финансирање и буџет и Законодавно-правната комисија, иако, според собранискиот Деловник, расправата во овие две тела е задолжителна. Таа мора прво да заврши, а потоа да продолжи предвидената процедура за негово усвојување.

Координаторот на пратеничката група на СДСМ, Игор Ивановски, најави дека за овој план ��ретседателот на Собранието Трајко Вељаноски ги информирал на координација. Од Кабинетот на првиот парламентарец вчера тоа ниту го потврдија, ниту го демантираа. Немаше ниту информација дали е планирано за буџетот денеска да расправа парламентот, ниту дали овој документ веќе е вратен во Владата.

Премиерот Никола Груевски вчера апелираше до опозицијата да го деблокира усвојувањето на буџетот, бидејќи СДСМ и Црвенковски на овој начин во заложништво ги држат граѓаните. Според него, логично е буџетот да кореспондира со програмата што победила на изборите.

Социјалдемократите вчера обвинија дека претседателот Вељаноски по налог на Владата спречил да се одржи седница на Комисијата за финансирање и буџет. Координаторот на пратениците на СДСМ Ивановски најави дека за да го спречат донесувањето на буџетот, нема ја напуштат парламентарна зграда за да го спречат носењето на буџетот.

„Од вчера започна да се спроведува партиско-полицискиот пуч во оваа држава. Спротивно на Уставот, на Законот за Собрание и на Деловникот владејачкото мнозинство треба да го донесе буџетот на шверцерски, шп��унски и незаконски начин. Лицето Трајко Вељановски, извршителот на ова сценарио на сила треба да го вметне буџетот на седница.

Ова не смее и нема да помине“, предупреди Ивановски и побара од Вељаноски да се повлече од спроведувањето на ова сценарио.

Експертите предупредуваат дека доколку навистина се случи претседателот Вељаноски да ги прескокне надлежните комисии и да ја продолжи постапката за усвојување на буџетот, ќе се направи огромен преседан, кој ќе биде на штета на демократијата во државата. Поранешниот генерален секретар на Собранието Александар Новаковски смета дека претседателот на Собранието нема толкава надлежност и мора да ја почитува процедурата што е пропишана во Деловникот.

„Ако буџетот се врати во Владата без извештај од матичните тела тогаш тоа е кршење на Деловникот. Во тој случај претседателот на парламентот ги суспендира работните тела и си зема улогата на цело Собрание во свои раце. Ваквиот буџет пратениците може да изгласаат, но оваа одлука ќе падне на Уставен суд. Во таков случај целата одговорност ќе биде на претседателот на парламентот, бидејќи Владата ќе биде чиста“, објаснува Новаковски.

Состојбите во парламентот викендов дополнитено ескалираа, откако претседателката на Законодавно-правната комисија Благородна Дулиќ закажа седница на која требаше да се расправа за амандманите на буџетот. Одржување на седницата на дозволија опозициските пратеници предводени од СДСМ, кои со песна, знамиња и свирчиња оневозможија услови за работа. За социјалдемократите е спорно и тоа што иако претседателот на Комисијата за финансирање и буџет за вчера закажа седница, во Собранието не им беше дозволено да работата. Салата каде се одржуваат седниците беше заклучена, а ги немаше ниту службите кои стручно и овозможуваат на Комисијата да работа. За нив, но и претседателот на Собранието вчера било неработен ден.