20.12.2012, 15:24 СДСМ не отстапува од нивниот план за штедење
За опозицијата е неприфатлив предлогот министерот Ставрески писмено да се изјасни за амандманите, по што за буџетот пратениците да расправаат само на пленарна седница
Наместо да ги приближуваат, владејачкото мнозинство и опозицијата уште повеќе ги оддалечуваат позициите околу усвојувањето на буџетот за наредната година и можноста за неговото деблокирање. И денешната трета координација по ред кај претседателот на Собранието Трајко Вељаноски, помина неуспешно и без договор за надминување на блокадата на финансискиот план за наредната година. За СДСМ и за другите претставници од опозицијата бил неприфатлив предлогот на Вељаноски Министерството за финансии писмено да се изјасни за над 1.200 ��мандмани, потоа тој извештај со мнозинство гласови да биде прифатен на Комисијата за финансирање и буџет и Законодавно-правната комисија, по што за буџетот пратениците ќе расправаат на пленарна седница. Пред продолжението на координацијата кај Вељаноски, што беше закажана за вчера попладне, координаторот на пратениците од СДСМ Игор Ивановски побара од него да го повлече ваквиот предлог и го обвини за партиски пуч врз парламентот.
„Претседателот Вељаноски во име на власта обзнани сценарио за партиски пуч во оваа држава, со кое треба да се погази, поништи Уставот, Деловникот, начинот на функционирање на ова Собрание во изминатите 20 години. Се надеваме дека ќе се откажат од ова катастрофално сценарио. Во спротивно, сите последици што ќе произлезат доколку останат на ова сценарио ќе бидат резултат или одговорност само на владејачката коалиција“, изјави Ивановски.
Тој појасни дека, според планот на ВМРО-ДПМНЕ, предвидено било по писменото изјаснување на Ставрески за амандманите Комисиите да не заседаваат, пратениците од мнозинството писмено да одговорат дека се согласуваат со него, и на крај претседателите на Комисиите да потпишат извештај во којшто без дебата буџетот е завршен. Ако не го сторат тоа, мнозинството пратеници во нивно име ќе се потпишат.
Преговорите околу буџетот, дополнително ги комплицираат партиите на Албанците ДПА и НДП кои заедно имаат поднесено над 600 амандмани. И двете партии вчера, иако поканети, не присуствуваа на координацијата кај Вељаноски. Пратеникот од ДПА Зијадин Села повтори деа главниот проблем на буџетот е што е антиалбански бидејќи ништо не се инвестира во регионите каде мнозинство е албанското население.
Изет Зеќири од НДП рече дека не присуствувал на средбата бидејќи планот на Владата бил несериозен и оти вчера министерот за финансии Ставрески јасно порачал дека ќе прифати проекти што ќе се вклопат во владините проекти. Неговите амандмани се однесуваат, главно, на инфраструктурни проекти во вредност од 80 милиони евра. Разговорите за повлекување на неговите амандмани, вели тој, може да продолжат на политичко и на експертско ниво.
„Да предложев изградба на фонтана можеби ќе прифатеа, но јас предлагам сериози инфраструктурни проекти, а тоа за нив не е важно“, коментира Зеќири. (Т.П.)
|
