ДПА бара предвремени избори

Опозицијата чека оставки од вицепремиерката Теута Арифи и од министерот за одбрана, Фатмир Бесими

Светлана Унковска

Демократската партија на Албанците побараа вицепремиерката за евроинтеграции Теута Арифи и министерот за одбрана Фатмир Бесими веднаш да си поднесат оставки поради неуспехот на Самитот на НАТО, како и да се закаже итна собраниска седница која ќе резултира со распуштање на Собранието и распишување вонредни парламентарни избори. Несогласување со политиката на премиерот Никола Груевски изразија и од партијата на Руфи Османи, кои побараа од ДУИ да се дистанцира од ставовите што премиерот ги изнесе во интервјуто за државната агенција МИА.

„ДПА се дистанцира од речникот на премиерот, кој е против НАТО. Бараме од ДУИ да се изјасни околу недобивањето покана за членство во НАТО и јавно искажаните ставови на нивниот премиер, вицепремиерката Арифи и министерот за одбрана Бесими веднаш да си поднесат оставки, да се свика итна собраниска седница за невлегувањето во НАТО и таа да резултира со распуштање на Собранието и распишување вонредни избори“, истакна Имер Алиу од ДПА. Тој истовремено ја повика и меѓународната заедница да влијае под итно да се отвори политички дијалог меѓу четирите политички партии.

Изет Зекири од НДП истакна дека не се согласува со ставовите на премиерот Груевски, кој, како што рече, наместо да се занимава со проблемите и да биде самокритичен, го обвинува НАТО.

„Бараме од ДУИ да се дистанцира од оваа изјава на премиерот чија политика ја води државата во самоизолација и во некоја насока која само ДУИ и ВМРО-ДПМНЕ ја знаат“, истакна Зекири.

Во одбрана на ставовите на премиерот вчера застанаа пратениците од владејачкото мнозинство кои сметаат дека интервјуто на Груевски е отворено и искрено. Тие смируваат дека за членството во НАТО треба да се има трпение бидејќи Македонија ги исполнила сите критериуми и дека со време ќе го добие заслуженото место.

Павле Трајанов од Демократскиот сојуз повтори дека членството во НАТО останува наш врвен приоритет и дека државен интерес е Македонија што побргу да добие влез во Алијансата. Прашан дали се согласува со опозицијата премиерот на седница на парламентот да одговори зошто Македонија не стана членка на НАТО, тој рече дека тој тоа би можел да го направи и на седницата за пратенички прашања.

Малиша Станковиќ од Социјалистичката партија истакна дека Македонија, за жал, повторно се соочи со историска неправда и дека е од заеднички интерес на Македонија и на Грција да се реши проблемот со името, но дека кај другата страна не постоел интерес за надминување на спорот.