Последната битка на Арбен Џафери

Почесниот претседател на ДПА и истакнат политичар почина вчера во 15,50 часот на Клиниката за неврохирургија во Скопје

Арбен Џафери, долгогодишен лидер на ДПА и пратеник, почина вчера во 15,50 часот на Клиниката за неврохирургија во Скопје, каде што шест дена беше во кома по доживеаниот мозочен удар. Имаше 64 години и во изминатите две децении остави впечатливи траги во македонската политика, како контроверзен, но харизматичен лидер на една од водечките партии во албанскиот блок. Роден е во Тетово на 24 јануари 1948 година. Дипломирал на Филозофскиот факултет во Белград.

Иако три дена беше во стабилна состојба, но во бессознание, на Џафери завчера, како што велат лекарите, нагло му се влошила здравствената состојба, како последица на големо крвавење во мозокот.

Според неврохирурзите, биле преземени сите тераписки можности, но ваквите случаи најчесто завршуваат фатално.

Почесниот претседател на ДПА повеќе години се лекуваше од Паркинсонова болест, поради што бавниот и засипнат говор стана негов препознатлив знак. Џафери се препознаваше и по контроверзните, но автентични ставови за иднината на државата и на меѓуетничките односи, бидејќи еднаш се залагаше за соживот меѓу Албанците и Македонците, а друг пат повикуваше на мирна поделба на државата. Но, и неговите политички противници се согласуваа дека стилот и реториката на Џафери ги карактеризира луцидност и елоквентност.

„Тоа е најнормалната работа што би можел да ја направам“, изјави Џафери пролетта 2007 година кога замина од лидерската позиција во ДПА и му го препушти кормилото на Мендух Тачи.

Влошеното здравје, но и заморот од дневната политика, се споменуваа како причини за неговото повлекување. Оттогаш, Џафери живееше на релација Тетово - Приштина, додека неговото семејство, сопругата и децата, долги години живеат во Норвешка.

Но, иако во изминатите неколку години беше на поголема дистанца од дневната политика, Џафери никогаш не се оддалечи од партијата што ја основаше и каде што остана почесен лидер. Во последните месеци, тој можеше почесто да се види на јавна сцена. Присуствуваше на седницата на Централното претседателство на која беше донесена одлуката за соработка со опозицијата од македонскиот политички блок, а потоа се појави и на средбата на раководствата на СДСМ и на ДПА.

Како лидер на ДПА, Џафери, во периодот 1998-2002 година, беше дел од власта, односно од Владата на ВМРО-ДПМНЕ, на чело со Љупчо Георгиевски. Во август 2001 година беше меѓу четворицата лидери на партии што го потпишаа Рамковниот договор, чија 11-годишнина се одбележа пред неколку дена. (А.М.М.-Ј.Ј.)