Мое ќоше

��ази Владата заседава

Ерол Ризаов

Пред Владата треба да се стави знак за забрана на ѓурултија

Фатив уплав кога во еден од нашите весници прочитав колку работела Владата. Ми дојдоа солзи на очи кога видов колку се мачат премиерот и министрите само нам да ни биде поарно. Замислите луѓево од крв и од месо седнале напладне, точно во 12 часот и работеле до четири саат утредента сабајле. Цели 16 саата муабетеле тешки теми, ги мереле зборовите како на кантар за многу важни работи од кои зависи нашето опстојување и живеење, нашата егзистенција, нашата иднина. Разгледале дури 102 точки и уште 80 поточки. Пред мугри во живи темници се разишле пред да ги нападне дневното светло. Летнале брзо малку да дремнат и пак да дојдат на работа да ги дозавршат работите што ги разгледале во точките и запирките. Навистина ми падна жал за луѓево кои ноќе работат како рудари, а дење спијат по два три саата, а потоа цело време дремат. Предлагам пред Владата да се стави знак за забрана на ѓурултија. На импозантен билборд да стои со големи букви: Пази Владата заседава. Задолжителна е сликата на премиерот како оди на прсти, а со показалецот преку устата и носот шепоти пссст....

Можете ли да претпоставите какво мачење е тоа 16 саата да седите на столче, па макар било премиерско или министерско. Во најдобар случај ќе добиете само хемороиди. Без цигари, со многу кафиња, мала пауза за ручек од нога, цело време стискање за мала и голема нужда, сексуална апстиненција, интензивен интелектуален и физички замор, секирации, загриженост и огромен товар на одговорност, сето тоа на едно место е многу силен стрес и нездрава работа. И непроветрениот воздух во владината сала влијае штетно. Оној познат и популарен д-р Оз на една од најгледаните ТВ-емисии во Америка кои и нашите гледачи имаат можност да го видат преку Хрватската телевизија вели дека луѓето не треба да се срамат што испуштаат гасови. Тоа е здраво и неопходно за човечкиот организам, а се случува најмалку 15 пати за 12 часа. Не е ништо страшно ако малку замириса, треба да се отвори прозорец и да се проветри просторијата. Пресметав дека ако за време на седниците на Владата покрај премиерот, министрите и нивните соработници и стручни служби се поканети експерти и стручњаци, тогаш обично присуствуваат околу 40 до 50 луѓе. За 16 часа, тие според д-р Оз, испуштаат гасови вкупно од 760 до 950 пати. Што не е безопасна концентрација ако нема добро проветрување.

Шегата на страна, што значат долгите 16-часовни седници. Владите кои се во војна, или имаат вонредна состојба во својата земја поради голема временска непогода, ураган, земјотрес, нуклеарна хаварија и кои се во таканаречено постојано заседание не поминуваат 16 часа на работа, бидејќи таквиот замор може да предизвика контрапродуктивни резултати. На тркалезната маса на француската влада, на пример, на централно место е стар часовник кој опоменува дека не би требало седниците да траат повеќе од еден час. И многу други влади и премиери се познати по својата ефикасност кога на владините седници се носат клучни и стратешки одлуки и предлог-закони, а се' друго е во одговорност на надлежните министерства и институции на системот. Долгите расправи по цели ноќи и денови покажуваат и многу други работи кои не се гледаат на прв поглед. Ако не е гол маркетинг дека владата многу работи, тогаш е јасно дека Владата нема самодоверба. Само во демократски недоизградените системи, каде што целата власт и целата одговорност се префрла на еден човек седниците траат со денови. Цврстата централизација и одлучување за секое прашање со одобрување на премиерот, а за кое и по законски пат се надлежни само министерствата, владините агенции и фондови, е доказ дека надлежните институции не можат да донесат самостојно одлука и таму каде што имаат цврсти законски овластувања. Така се суспендираат институциите на системот. Во владата на Никола Груевски не може да се направи ниту еден потег без негов амин. Тоа ја намалува одговорноста кај надлежните министри и ресори кои треба да одлучуваат независно. За долгите владини седници најдобра илустрација деновиве даде еден од министрите кога рече: конечно заврши оваа маратонска седница, ајде сега да одиме нешто да сработиме.

Симптомите од таа хронична болест да се заседава со часови и денови останале и ден денеска како наследство од социјализмот, која добро ја увидел првиот италијански амбасадор во Незав��сна Македонија кој во еден од своите извештаи до италијанското Министерство за надворешни работи наводно напишал: интересно е и тоа што Македонците кога седат и беседат на состаноци мислат дека работат.