Дали ДОС ќе стане ДОМ

Бранко Црвенковски доби овластување од СДСМ да ги почне преговорите за проширување на опозицискиот фронт

Се официјализираат најавите на СДСМ за проширување на опозицискиот фронт, по примерот на Демократската опозиција на Србија (ДОС), која пред 12 години ги симна од власт социјалистите на Слободан Милошевиќ.

Централниот одбор на СДСМ денеска најверојатно ќе го овласти партискиот лидер Бранко Црвенковски да ги почне преговорите за соработка со опозициските партии што досега не беа дел од коалцијата со која социјалдемократите настапија на последните парламентарни избори.

Извршниот одбор на СДСМ, прексиноќа, донел одлука Црвенковски лично да ги покани на соработка лидерите на опозициските партии од албанскиот блок, како и партиите кои по изборите останаа надвор од парламентот. Се очекува покани да добијат лидерите на ВМРО-Народна партија, Љупчо Георгиевски, на Либерално-демократска партија, Андреј Жерновски и на ДПА и на НДП, Мендух Тачи и Руфи Османи. Сите овие партии, како и нивните лидери, во минатото имале несогласувања со СДСМ и Црвенковски, но сега нивен заеднички противник е коалицијата ВМРО-ДПМНЕ - ДУИ, односно двоецот Никола Груевски - Али Ахмети, кои ја трошат четвртата година од нивното заедничко коалицирање. Потенцијалните нови политички партнери на СДСМ во изминатите месеци испраќаа повеќе директни или индиректни сигнали дека, и покрај идеолошките разлики, се расположени за соработка со левичарската опозициска коалиција.

Во опозицискиот фронт на СДСМ сега учествуваат петнаесетина партии од македонскиот блок и на помалите етнички заедници. Од преговорите што ќе се водат во наредниот период зависи дали поранешните премиери Црвенковски и Георгиевски, кои некогаш беа лути политички противници, сега ќе се најдат во ист табор против Груевски, дали ЛДП на Жерновски ќе се врати во старото друштво, дали (по 20 години соперништво) ќе се случи помирување меѓу СДСМ и ДПА, дали Црвенковски и Османи ќе седнат на иста маса...

Од модалитетите на соработка што ќе се договорат, пак, зависи д��ли идните партнери ќе настапат во коалиција на претстојните локални избори или соработката ќе ја остават за вториот круг, како и дали премиерно во историјата на независноста ќе имаме мешана коалиција меѓу партии од македонскиот и албанскиот блок.

Црвенковски уште летоска, веднаш по изборите, најави ширење на опозицискиот фронт, не само со други политички субјекти, туку и со невладини организации, здруженија на граѓани и поединци кои сакаат да се придружат во битката против ВМРО-ДПМНЕ.

„Опозициското расположение во земјата е мнозинско, но се' уште е расцепкано и заради заканите и притисоците од власта во голем дел притаено, пригушено. Основна задача на опозицискиот фронт ќе биде тој општествен револт и желба за промени да ги обедини, да ги охрабри и артикулира во една единствана политичка сила доволно моќна да ги изведе промените“, изјавуваше тогаш Црвенковски. (А.М.М.)