Втора снежна акција на армиските хеликоптери

Центарот за кризи ги снабдуваше отсечените села во Липково, Ранково, Крива Паланка и Новаци

Продолжува воздушната акција за обезбедување основни средства за жителите во селата завеани од снежните наноси. Армиските ��еликоптери вчера вршеа дотур на продукти за отсечените села од општините Липково, Ранковце, Крива Паланка и Новаци. Со потребната храна, сточна храна, лекови и хигиенски средства беа снабдени жители од 16 македонски села.

Од Центарот за управување со кризи најавија дека доколку дозволат временските услови, во соработка со АРМ и Координативното тело за справување со снежните состојби, по воздушен пат ќе ги снабдуваат и општините Чучер-Сандево, Сопиште, Студеничани и Зелениково. Во населените места од овие општини снегот се издигна и до 2 метри.

Во Гостиварско, пак, ЦУК и локалниот Црвен крст доставуваа пакети за селата од општината Врапчиште, но и за Маврово-Ростуше. Во овие предели повеќе од една недела се отсечени околу шеесетина жители, меѓу кои и петнаесетина деца. Доставените пакети содржат брашно, зејтин, шеќер, конзервирана храна и суви тестенини.

Поради снегот повторно беше беше воведена забрана за тешки товарни возила на патните правци Дебар - Струга, крак Маврово - Дебар, Тетово -Попова Шапка и планинскиот превој Стража. На дел од премините забраната важеше и за меѓуградските автобуси.

Инаку, Управата за хидрометеоролошки работи за наредните денови предвидува облачно време и нови врнежи од снег. Температурите ќе варираат од минус 14 до 2 Целзиусови степени. (Б.Ш.)