Атина го чека одговорот

За грчкото Министерство за надворешни работи е енигма дали е пратен или не одговорот на меморандумот

Од нашиот дописник
Миркица Поповиќ

Атина - Македонскиот одговор на грчкиот меморандум за соработка, до петокот попладне, не беше стигнат во грчкото Министерство за надворешни работи. Различните најави од македонското МНР и од нашите медиуми предизвикаа конфузија дали наскоро ќе биде испратен или веќе е испратен одговорот на грчкиот предлог до Атина. Од грчкото МНР тврдат дека се' уште нема одговор и единствено што знаеја е дека тој се подготвува и ќе биде испратен наскоро, како и тоа дека во него ќе бидат споменати хашката пресуда и Привремената спогодба. Неофицијално, грчки извори објаснуваат дека ваквите преписки и документи се праќаат преку канцелариите за врски во нашата земја и во Грција и дека на таков начин стигнал грчкиот предлог-меморандум до нашето МНР. Ако е точно дека е пратен одговорот на меморандумот, а го нема во МНР, тогаш вашиот амбасадор веројатно заглавил во штрајкот вчера или го носи пешки - се пошегуваа овие извори, додавајќи дека нестрпливо очекуваат да видат што содржи.

Досега македонската и грчката страна ги информираа медиумите за нивните испратени писма и протестни ноти, а од македонска страна обично брзо се објавуваа и одговорите од грчката страна, со исклучок на одговорот на писмото на премиерот Адонис Самарас кој го објави грчки весник близок до владејачката партија.

Меморандумот за соработка беше испратен во почетокот на октомври од страна на шефот на грчката дипломатија, Димитрис Аврамопулос, до министерот Никола Попоски. Целта на меморандумот, како што беше објаснето од грчка страна, е да се договорат рамката и основните параметри во кои се движат преговорите за спорот за името и да се даде нова динамика на процесот. Како што објаснија од грчкото МНР веднаш по објавувањето на меморандумот, текстот не е конечен договор, туку предлог на кој се чека одговор од македонската Влада, а потоа ќе се види како може да се развие. „Сега засега е предлог кон Владата на БЈРМ и чекаме нивен одговор да ја видиме реакцијата. Се надеваме дека ќе има позитивен одговор“, истакна тогаш портпаролот Григорис Делавекурас.

Минатата недела тој искажа разочараност пред новинарите зашто се' уште не го виделе одговорот, а место тоа само гледаат негативни коментари и негативен став кон меморандумот. Тој дури го коментираше интервјуто на Попоски за австриски весник со заклучок дека за македонската страна меморандумот е бесмислица. И покрај ова, од грчкото МНР велат дека остануваат во исчекување позитивен одговор од македонската Влада за меморандумот со кој би се подобриле односите меѓу двете страни.

Уште при објавувањето на меморандумот, за грчките аналитичари беше нејасно дали документот е некаква нова привремена спогодба. Иако го оценија како позитивен секој обид преговорите да мрднат од мртва точка, сепак, забележаа дека се сомневаат во резултатите од овој текст, кој ќе отвори паралелни преговори за преговорите за името. И ним им паднаа в очи елементите во него што се неприфатливи за македонската страна, како што е грчката црвена линија за име со географска одредница ерга омнес. Процените беа дека Македонија нема да го одбие меморандумот, туку ќе одговори со познатите аргументи, со што ќе се отворат паралелни преговори за рамката за името. Грчкото МНР при претставувањето на меморандумот не објасни кои ќе бидат идните чекори.