Ставрески загрижен за растот на цените

Владата будно го следи зголемувањето на цените, но засега не најавува директни мерки што можат да го ублажат ценовниот шок

Соња Маџовска

По шокантниот августовски бран поскапувања, министерот за финансии, Зоран Ставрески, вчера од Струмица изрази загриженост дека зголемувањето на цените на струјата, парното, горивата може да предизвика инфлаторен бран, односно да повлече раст на цените на сите други производи и услуги.

Министерот Ставрески порача дека Владата будно ја следи актуелната состојба со зголемувањето на цените што се случуваат на светско ниво и кои директно влијаат на домашниот пазар, но засега не најавува директни мерки што можат да го ублажат овој ценовен шок. Според Ставрески,

владините мерки се во насока на создавање услови за отворање нови работни места и помош за најзагорезените категории преку социјалните програми.

„Загрижува состојбата на светскиот пазар со осетното зголемување на цената на основните прехранбени артикли. Завчера на светската берза во Чикаго се забележа најголем скок на цената на пченицата, пченката и сончогледот во последните 27 години. Ова, секако, ќе влијае и ќе има нов бран поскапувања. Што се однесува до цената на нафтата и нафтените деривати, неа ја диктира, пред се', кризата на Блискиот Исток и скокот на доларот во однос на еврото. Владата е загрижена за ваквата состојба и во рамки на своите надлежности презема низа мерки преку отворање нови работни места и социјална програма за да ги ублажи ударите врз животниот стандард на граѓаните“, изјави вчера Ставрески.

Тој само пред два дена уверуваше дека Владата ќе направи се' што е во рамки на нејзините можности да не дојде и до зголемување на даноците, што ќе претставува дополнителен товар за стопанството и за граѓаните.

Според него, буџетот претставува еден од клучните инструменти за поддршка на стопанството преку високиот износ на капитални инвестиции. А една од мерките што се презеде пред неколку месеци за да им се помогне на компаниите се и евтините кредити од Европската инвестициска банка. Првиот финансиер вчера објави дека веќе се одобрени првите средства преку Македонската банка за поддршка на развојот. „Обезбедените 100 милиони евра од ЕИБ се главен инструмент во борбата против актуелната економска криза и добро е што има интерес за нив. Веќе првите 20 милиони евра се побарани за изработените проекти и ќе бидат доделени во почетокот на септември. Околу 80 претпријатија аплицираа и со тоа ќе добијат ликвидни средства за инвестиција во нивниот понатамошен развој“, изјави Ставрески. Според него, голем бил интересот и за средствата од Македонската банка за поддршка на развојот, на земјоделските претпријатија и претпријатија за откуп и преработка на земјоделски производи. Околу 19 фирми, кои вршат откуп на зеленчук и грозје, покажале интерес за овие финансиски средства. Од нив пет во целост ги исполниле стандардите и тие во текот на следната недела ќе ги добијат средствата од 1,6 милиони евра, а останатите треба да ги доработат проектите.