Четири македонски филма во трка за „Оскар“



Комисијата предводена од Димитар Грбевски ќе го одбере нашиот кандидат меѓу: „Трето полувреме“, „Балканот не е мртов“, „Жената што си ги избриша солзите“ и „Скопје ремикс“

Сунчица Уневска

Македонскиот кандидат за престижниот „Оскар“ за странски филм, кој ќе се бори за влез меѓу петте номинирани филмови за оваа награда во трката во 2013 година, ќе се избира меѓу четири филма. Имено, во конкуренција се влезени сите нови македонски долгометражни играни филмови кои ги пријавија нивните продуценти. А тоа значи дека годинава имаме силна конкуренција помеѓу Дарко Митревски, Александар Поповски и Теона Митевска, како и десеттемнина режисери кои го потпишаа омнибусот „Скопје ремикс“.

Филмовите на Дарко Митревски „Трето полувреме“ и на Александар Поповски „Балканот не е мртов“, своите премиери се очекува да ги имаат на претстојниот 33. Фестивал на филмската камера „Браќа Манаки“, кој ќе се одржи од 15 до 21 септември. „Трето полувреме“ ќе го отвори Фестивалот, а „Балканот не е мртов“ ќе биде прикажан на неговото затворање, со тоа што и двата филма се во конкуренција за „Златна камера 300“. По премиерите, би требало да бидат прикажани и во редовна кинодистрибуција во својата матична земја, барем седум дена, бидејќи тоа е еден од условите за да можат да влезат во трката за номинација за „Оскар“ за филмови од неанглиско говорно подрачје. Другите услови се режисерот и сценаристот, односно поголемиот дел од креативната екипа да е од матичната земја, што овие филмови ги исполнуваат.

Филмот на Теона Митевска, „Жената што си ги избриша солзите“, македонската публика веќе имаше можност да го види. Неговата премиера се одржа на годинешниот Берлински филмски фестивал, во програмата „Панорама специјал“, по што следуваа и други фестивали, а само пред неколку недели на Фестивалот во Херцег Нови ја освои наградата за најдобра фотографија. Инаку, „Жената што си ги избриша солзите“ влезе и меѓу 40 најдобри европски филма, кои оваа година ќе се борат за номинациите за Европските филмски награди.

„Скопје ремикс“ на Јане Алтипармаков, Огнен Димитровски, Синиша Ефтимов, Срѓан Јаниќиевиќ, Даријан Пејовски, Саша Станишиќ, Ѓорче Ставрески, Вардан Тозија, Бојан Трифуновски и Борјан Зафировски, исто така, ја имаше својата кинодистрибуција во Скопје. Овој филм влезе и во трката за наградата „Бауер“, која се доделува за најдобриот филм од регионот на Филмскиот фестивал во Мотовун, Хрватска.

Како што ни рече претседателот на Друштвото на филмски работници, Горјан Тозија, веќе е оформена и комисијата која ќе го одбере нашиот годинашен претставник во трката за „Оскар“. Претседател на комисијата е филмскиот и телевизиски монтажер, професор на ФДУ, Димитар Грбевски, а членови се: Русомир Богдановски, сценарист, Васил Христов, режисер, Роберт Јанкуловски, фотограф и Панта Мижимаков, продуцент. Нивната обврска е до крајот на септември да го одберат нашиот кандидат, чиј продуцент заклучно со 1 октомври ќе ја испрати копијата од избраниот филм, кој годинава ќе ја претставува нашата земја. Инаку, интересно е да кажеме дека Македонија изминативе години имаше повеќе кандидати за овие номинации, така, на пример, лани беше „Панкот не е мртов“ на Владимир Блажевски, пред тоа „Јас сум од Титов Велес“ на Теона Митевска, а во 2010 година во трката по трет пат беше Милчо Манчевски со „Мајки“, кој и досега ни ја донесе единствената номинација во категоријата на долгометражни филмови со својот првенец „Пред дождот“.