Викендов Берово центар на културниот перформанс

Фестивалот се одржува по четврти пат на плоштадот во Берово, а оваа година на него ќе настапат: „Фолтин“, „Баклава“, „Чалгија саунд систем“, ансамбл „Чинари“ од Бугарија и други

Викендов сите патишта водат кон Берово, каде што на 25 и 26 август ќе се случува „Етно плоштад фестивал“, културен перформанс, подвижен музеј на културното богатство негувано од нашите најголеми музички амбасадори. Фестивалот се одржува по четврти пат на плоштадот во Берово, а оваа година на него ќе настапат: „Фолтин“, „Баклава“, „Чалгија саунд систем“, ансамбл „Чинари“ од Бугарија и други. Посебна магиј�� на настанот ќе даде и саемот на традиционални производи „Малешевијата на дланка“. Шаренилото на бои и богатството на производи на многубројните штандови му дава посебен дух на целиот плоштад, на кој ќе има ракотворби, сувенири и резби изработени на традиционален начин или стилизирани, медови, млечните производи кои се подготвени по традиционални рецепти и од природни суровини.

Досега на фестивалот настапиле: „Синтезис“, „Танец“, „Љубојна“, „Монистра“, Паола Блантон од Бразил, Мари Лор од Франција, Дебора Гарсија од Бразил, Ксенија Вискет од Словенија... Организатор на „Етно плоштад фестивал“ е Општина Берово.