24.08.2012, 14:55 Поштар лажно пријавил дека му украле 350.000 денари
Вработен во „Македонска пошта“ смисли како на лесен начин да заработи 350 илјади денари – тој исценирла и лажно пријавил дека е жртва на разбојништво и дека крадците го оставиле без парите кои ги носел со себе.
Четириесет и петгодишниот поштар од Скопје, на седми август пријавил во полициската станица „Гази Баба“ дека е жртва на разбојништво. Тој кажал дека, наводно, при достава на пошта на улицата „Јани Лукровски“ во Скопје, кога влегол во лифтот во една од зградите, бил нападнат од две непознати лица. Според неговата верзија на настанот, едниот од напаѓачите ја отворил вратата од лифтот, потоа го испрскал со спреј и го удрил по глава. Разбојниците за кои раскажувал поштарот, му ја одзеле торбата во која носел 350.000 денари, го притиснале копчето на лифтот за десетиот кат, по што побегнале. Поштарот тврдел дека кога стигнал на десетиот кат побарал помош од станарите, по што случајот го пријавил во полиција.
По направените проверки во АД „Македонска Пошта“ било констатитрано дека поштарот бил задолжен со 400.000 денари. До моментот на „разбојништвото“ тој исплатил парични средства на седум места, по што му останале во торбата околу 370.000 денари.
Надлежните се посомневале во приказната на поштарот, поради што тој бил подложен на полиграфско тестирање. Тоа регистрирало реакции карактеристични за давање лажен одговор во врска со пријавеното кривично дело. Подоцна, била направена анализа која покажала дека поштарот го измислил настанот, а дека парите ги искористил за да си ги подмири долговите.(Љ.С.)
|
