Две лица загинаа во оружен напад во центарот на Њујорк

Полицијата интервенирала неколку минути по нападот, по што дошло до престрелка во која напаѓачот е убиен, а десетина лица се ранети

Вашингтон - Вооружен напаѓач денеска изутрина започнал престрелка со полицијата пред зградата Емпајр стејт билдинг во центарот на Њујорк, при што десетина лица се повредени, а напаѓачот и уште едно лице се убиени.

Сведоците на нападот го опишаа напаѓачот како човек облечен во костум, со акт ташна, кој нападот го почнал веројатно по расправија со колега, јави дописникот на МИА од Вашингтон.

Напаѓачот, за кого се претпоставува дека неодамна бил отпуштен од работа, двапати го застрелал својот колега. Нападот предизвикал панично бегство на случајните минувачи.

Полицијата интервенирала неколку минути по нападот, по што дошло до престрелка во која напаѓачот е убиен, а десетина лица се ранети.



Првичните полициски информации не откриваат дали напаѓачот пукал врз случајните минувачи или пак ранетите биле погодени во престрелката. По првичната паника, полицијата дозволила да продолжи редовната работа во Емпајр стејт билдинг и во околните деловни згради. (МИА)