Големиот предизвик за новиот шеф на „Њујорк Тајмс“

За разлика од Би-Би-Си, Томпсон сега ќе мора да го направи истото во комерцијална компанија во која огласите и продажбата се најважни

Новоизбраниот извршен директор на „Њујорк Тајмс“, Марк Томпсон, го чекаат нови предизвици, слични на тие со кои се соочуваше и во Би-Би-Си, односно да се воведе овој сериозен бренд  во електронскиот и глобален свет на медиумите и да се воспостави рамнотежа меѓу конкурентските политички центри на моќ.

Единствена разлика е во тоа што сега ќе мора да го направи истото во комерцијална компанија во која огласите и продажбата се најважни, за разлика од медиумите кои се заштитени од владата, кај кои голем дел од приходот доаѓа од претплата на гледачите и читателите.

Според годишниот извештај за претходната и оваа година кој е објавен во јули, комерцијалните приходи на Би-Би-Си, изнесувале само 348,44 милиони долари, додека 5,66 милијарди долари се заработени од претплата.

- Ова ќе биде прв пат Марк Томпсон да се соочи со сериозен комерцијален притисок - рече Стив Хјулит, советник за медиуми и поранешен новинар на Би-Би-Си.

- Да се работи на електронски развој на Би-Би-Си кога не мора да се грижите за парите е една работа, а да се работи тоа истото кога акционерите ви дишат во врат и ви ја уништуваат работата е нешто друго - додава Хјулит.

Тоа не значи дека Томпсон не е дораснат за таа задача. Извори велат дека овој извршен директор со оксфордска диплома, не се плаши од тешки одлуки, од намалување на трошоците, до укинување на омилени емисии.

Томпсон (55) кариерата ја изградил во Би-Би-Си каде во 1979 година работел како приправник, а потоа работел на емисии како што се „Њузнајт“ и „Вести во 9“, пред да стане генерален директор, што во британската телевизиска индустрија се смета за највисока позиција.

Во Њујорк Тајмс доаѓа во периодот на големи промени во оваа медиумска куќа, но и во пошироката американска новинска индустрија, која доживеа голем пад во продажбата и огласувањата, при што не се сметаше дека онлајн приходите можат да направат битна разлика.

Читателите се повеќе вестите ги читаат на своите смартфони и таблети, што доведе до масовни загуби од огласите во печатените медиуми. Приходите од огласите во Тајмс паднаа за 8 отсто во второто тромесечие оваа година, додека електронското огласување падна за околу 2 отсто.

Извори дури велат дека едно од клучните прашања поврзани за Томпсон е дали тој ќе биде во состојба да го примени своето искуство да ги убеди британските законодавци и даночни обврзници да дадат пари за Медисон Авенју, во што има ограничено искуство.

Продолжена рака

Компанијата Тајмс порано беше огромен медиумски конгломерат со ТВ и радио станици, магазини и десетици весници, а поседуваше акции во спортски клубови како што се бејзбол тимот Бостон Ред Сокс и фудбалскиот клуб Ливерпул.

Но, со тек на годините безмилосно го трошеа својот имот. Компанијата минатата недела рече дека размислува да ја продаде интернет страната About.com за наводни 270 милиони долари, а во декември ја продадоа својата регионална новинска група за 143 милиони долари.

Како резултат на тоа, компанијата се сведе на својот водечки весник „Њујорк тајмс“, кој се` уште е најзначаен весник во светот, со своите три братски публикации: „Бостон Глоуб“, „Интернешнал Хералд Трибјун“, „Ворчестер Телеграф“ и „Газет“.

Приходите и акциите на компанијата Тајмс значително паднаа. Приходот во првата половина на годината падна за 30 отсто, во однос на истиот период пред четири години. Цената на акциите падна од високи 53 долари на помалку од 10 долари.

За разлика од тоа, според годишниот извештај објавен во јули, Би-Би-Си собра вкупно 6,52 милијарди од претплата, од комерцијални операции и од своите светски и надзорни сервиси.

Ваквите деловни предизвици би биле доволни за кој било нов извршен директор, но Томпсон исто така мора да ја следи и интерната политика на владејачкото семејство Окс Сулцбергер.

Извори велат дека, иако тој е извршен директор, Томпсон всушност ќе биде само продолжена рака на директорот Артур Сулцбергер Помладиот, кој цврсто ја контролира компанијата. Претходната директорка Џенет Робинсон во декември ненадејно ја напушти компанијата по 28 години работа, поради нешто што изворите го наведуваат како судир со Сулцбергер околу водството и други прашања.

- Тоа е компанија која ја води едно семејство - рече Даг Артур, аналитич��р од Еверкор и додаде - Јас имам само едно прашање, зошто го прифатил тоа место?

Едно од можните објаснувања зошто Томпсон го прифатил местото може да биде едноставно локацијата. Томпсон е оженет со американската писателка Џејн Блумберг со која има три деца и неговиот поранешен соработник рекол дека тие секоја година одат на одмор во нејзината семејна куќа во САД. Изворот додава дека сопругата на Томпсон сакала да бидат поблиску до нејзиното семејство.

Аналитичарот Артур исто така наведува, дека иако компанијата е под контрола на едно семејство, Томпсон како извршен директор ќе има одреден степен на автономија во работата, за да докаже дека е способен да ги води акциите во неа.

Претставник на компанијата Тајмс одби да ја коментира оваа приказна.

Следен чекор кон телевизијата?

Со вработувањето на Томпсон во Тајм, Сулцбергер доби извршен директор кој го почитува новинарскиот интегритет, но кој не се плаши да донесе тешки одлуки околу трошоците кои треба да бидат во согласност со економската реалност.

Додека Сулцбергер, кој исто така е издавач и на „Њујорк Тајмс“, одбил да ги намали трошоците на редакцијата, а истото го направија и повеќето водечки дневни весници, Томпсон беше принуден да преземе мерки за штедење кои вклучуваат многу откази од Би-Би-Си.

- Всушност тој беше многу ефикасен во тоа да ги натера редакциите добро да ја вршат својата работа и да ги намалат трошоците - рече Емили Бел, поранешна извршна директорка на вестите во лондонскиот весник „Гардијан“ и моментално директорка за електронско новинарство на Универзитетот Колумбија.

Томпсон исто така на компанијата Тајмс  и носи проверени методи во се поважниот електронски бизнис. Тој е заслужен за развојот на iPlayer, апликација која на корисниците им овозможува бесплатно да ги прегледуваат пропуштени програми онлајн. Тој потег се смета за голем успех.

Исто така тој помогна BBC.com да стане еден од водечките глобални веб портали кој во јуни имаше околу 57 милиони посетители од целиот свет, како што наведува компанијата comScore.

Минатата година компанијата Тајмс воведе плаќање на своите електронски производи што до сега се покажа успешно во уверувањето на читателите да ги плаќаат вестите. Вкупниот број на дигитални претплати за NYTimes.com и BostonGlobe.com на крајот на второто тромесечје порасна за 13 отсто на 532.000.

Извор во редакцијата на „Њујорк Тајмс“ во вторникот изјави за Ројтерс дека клучното прашање поврзано за вработувањето на Томпсон е тоа - дали ова е знак дека одиме повеќе кон работа на телевизија или тој ќе го преземе истото што го работевме досега и тоа ќе го дистрибуира пошироко на глобално ниво.

Меѓутоа, некои извори го повторија ставот на британската медиумска аналитичарка Клер Ендерс, која смета дека на Томпсон ќе му биде тешко да го повтори успехот од Би-Би-Си во Тајмс.

- Ова не е потег кој значи: „Ова е човекот кој ќе ги трансформира трошоците на организацијата, ќе го промени моделот на работа до непрепознатливост, за да може компанијата да преживее и да ги зголеми приходите“, т.е. се она што обично го бараат акционери на некоја јавна компанија - вели Ендерс. (Радио Слободна Европа)