ДУИ не попушта - бара права и за ОНА

Ако нашиот предлог не биде прифатен, тогаш ние ќе ги разгледаме сите опции, вели портпаролот на ДУИ, Бујар Османи

Наум Котевски


Албанскиот партнер во Владата - ДУИ, поднесе барање до парламентот во предложениот Закон за посебни права на бранителите да се вметнат и борците на ОНА. Во спротивно, ДУИ очекува законот да биде повлечен.

„Доколку нашиот предлог не биде прифатен, а Законот за бранителите биде изгласан, тогаш ние ќе ги разгледаме сите опции“, изјави портпаролот на ДУИ, Бујар Османи, кој додава дека ситуацијата во која се наоѓа партијата не е добра.

Неговата партија вчера осцилираше во поглед на конкретноста во своите изјави. Интегративците одлучија првин да „кулираат“ по острите изјави на премиерот Никола Груевски, кој од Кичево потврди дека постои криза во коалицијата и дека ВМРО-ДПМНЕ е подготвена и за предвремени парламентарни избори.

„Продолжуваме со рутинска работа и исполнување на зацртаната агенда, во вообичаени околности, за реализација на партиските, националните и државните цели“, ни рече Османи.

Но, неколку часа подоцна од Османи стигна и повторената закана околу Законот за бранителите, на која може да се гледа и како потврда на нашите неофицијални информации дека завчера во Тетово била одржана неформална средба на потесното раководство, каде што преовладал токму тој став - ако биде изгласан Законот за бранители, кој ќе ги исклучи борците на ОНА, ќе нема Влада.

Тоа не ништо ново, бидејќи таква порака до ВМРО-ДПМНЕ уште пред неколку дена испрати генералниот секретар на партијата и министер за животна средина Абдулаќим Адеми, но е знак дека ДУИ мува не ја лази по изјавите на Никола Груевски, во кои неколку пати повтори дека нема да дозволи некој да го гази достоинството и образот на партијата и граѓаните на Македонија. ДУИ демонстрира дека е решена да оди до крај.

Османи, пак, чија партија, наводно, е задоволна и од поддршката што ја има од странските дипломати, вчера не сакаше да влегува во детални анализи на изјавите на Груевски. За коментарот на премиерот дека кризата е резултат на промените во однесувањето на дел од раководството на ДУИ, кое, според него, по последните парламентарни избори не се однесува коректно како што бил случајот во минатото, Османи кратко кажа: „Ние се однесуваме според нашата политичка стратегија и програма. Со нашето влегување во Владата таа стана и дел од нејзината агенда. Ние нема да го менуваме она за што добивме легитимитет од албанските граѓани“, посочи Османи, отфрлајќи ги претпоставките на Груевски дека ДУИ отстапила од практиката да се држи до зборот поради тоа што можеби чувствува дека ВМРО-ДПМНЕ го нема мнозинството во парламентот со 56 пратеници, па тоа го покриваат „интегративците“.

Во вчерашниот број „Утрински весник“ ги посочи четирите сценарија за излез од кризата. Помирување меѓу ВМРО-ДПМНЕ и Д��И, распишување предвремени парламентарни избори што ќе ги организира оваа Влада, растурање на Владата и формирање ново парламентарно мнозинство, и формирање техничка Влада која ќе организира предвремени избори. Третата опција, која ја вклучува варијантата СДСМ да формира влада со сите парламентарни партии на Албанците, опозициската ДПА не ја отфрла како можност доколку за тоа има расположение кај ДУИ.