Пуштен во употреба интернет портал за патувања со автобуски превоз



Министерството за транспорт и врски информира дека е пуштен во употреба интернет портал за планирање патувања во државата со автобуски превоз.

Планот на возење на сите меѓуопштински автобуски линии со пребарување по дестинации е поставен на интернет страницата или до него може да се пристапи и преку веб страната на Министерството за транспорт и врски.

Патниците може да ја одберат појдовната точка и местото на патување по што со едноставно пребарување се добива преглед на возниот ред, како и податоци за тоа кој превозник ја одржува автобуската линија, и во кој период и кои денови сообраќа автобусот.

- Пребарувачот на постојни автобуски линии претставува целосна база на податоци за автобускиот превоз во Република Македонија и истиот е во рамки на посебниот интернет портал за линиски превоз кој е воспоставен од страна на Министерството за транспорт и врски со цел модернизирање и олеснување на постапките за одобрување на автобуските линии, се наведува во соопштението од ресорното Министерство.

Оттаму истакнуваат дека имплементацијата на електронскиот систем им овозможува на превозниците да се ослободат од административните процедури за прибирање на потребната документација, а со додавање на можноста за пребарување на постојните автобуски линии во меѓуопштинскиот сообраќај им се дава можност на корисниците за брзо и прегледно добивање на податоци за возните редови.